Најдобра положба на спиење за новороденчето е спиењето на грб. Но, втор разумен избор, доколку детето има проблеми со таква положба, е спиењето на страна. Секако, ова е побезбедно од спиење на стомак. Инаку, безбедно е да му дозволите на вашето бебе извесно време да помине на стомаче кога е будно, додека вие го надгледувате.
Не го ставајте детето да спие на мека подлога, мека перница и играчки, или некои други украсни предмети. Тие можат да ги покријат дишните патишта на детето и да го стопираат дишењето. Не се предлага ниту користење на специјални помагала кои обезбедуваат детето присилно да спие на грб.
Советот бебето да го ставите на грб важи ако е родено на време и е уредно отпуштено од болница. Но, ако има одредени здравствени проблеми и не сте сигурни која положба е најдобра за него, консултирајте се со педијатар.
Во секој случај, родителите не би требало бебето да го оставаат само во просторијата, дури ни во текот на пократкото дневно спиење. Најдобро е преку ден, бебето да спие во близина на родителите, да го имаат на око, а навечер во соба со нив.
