Работите кои родителите му ги кажуваат на своето дете многу влијаат на сите аспекти од неговото живеење, вклучувајќи го и развојот на самодовербата. Како што објаснуваат психолозите, понекогаш родителите користат фрази за кои не ни знаат колку всушност се штетни. Една од тие фрази е „Никогаш нема да постигнеш ништо“.
Иако оваа реченица најчесто несвесно ја кажуваат родителите кога се разочарани од постапките или однесувањето на своето дете, истражувањата покажуваат дека таа штетно влијае на самодовербата на детето и придонесува за развој на несигурност. Така, кога родителите ќе му кажат на детето дека никогаш нема да постигне нешто што сака, како да му велат дека не веруваат во неговите способности.
Овие зборови носат одредена доза на демотивација на детето и можат да ги уништат неговите амбиции или соништа, а тоа доведува до недостаток на самодоверба кај детето и страв од неуспех. На ист начин, детето нема да биде склоно кон пробување нови работи, поради што може да почне да се „затвора“ во себе, а со тоа да биде поподложно на анксиозност и депресија, објаснуваат психолозите.
