Приближно 60 до 70 проценти од населението треба да се вакцинира за да се спречи ширењето на инфекцијата со новиот коронавирус, велат надлежните од Светската здравствена организација.
Стапката е одредена на основа на неколку студии, потенцира Кетрин О’Брајан, шеф на одделот на СЗО за имунизација.
Меѓутоа, таа вели дека реално потребната стапка на имунизација на луѓето за оваа пандемија, ќе стане јасна кога ќе се знае поваќе за вакцините кои засега се тестирани.
“Навистина е важно да почнеме да добиваме повеќе информации“, вели таа.
Освен сознанијата колку вакцините се во состојба да спречат зараза со КОВИД-19, прашање е дали отежнуваат вирусот да се задржи во носот и грлото кај лицата кои немаат симптомите и дали вакцините му отежнуваат на вирусот да се пренесува од едно на друго лице“, додава О’Брајан.
Од СЗО велат дека треба да се видат клиничките податоци и информации за добра производна пракса за да може да се оцени руската вакцина против коронавирусот Спутник V.
Руската вакцина, според тамошниот министер за здравство, е ефикасна над 90 проценти, повикувајќи се на податоци собрани за време на вакцинација на јавноста, наместо моментална постапка на испитување.
