Децата уште додека се мали впиваат се околу себе, па добра идеја е да го искористите тоа и да ги научите на некои одлични навики, како што е читањето. Без оглед на годините, приказните за добра ноќ кај вашето дете ќе поттикнат развој на мозокот, ќе ја засилат вашата врска и ќе му помогне да стекне важни вештини кои ќе му служат цел живот.
- Детето ќе се научи на трпение
Да се биде трпелив е вредна вештина во животот која на многумина им недостасува. За среќа, децата можат да го научат ова уште од мали нозе, бидејќи слушањето на приказните што им ги читате ги прави малите деца потрпеливи. Развивањето на трпеливост го прави вашето дете подобро во активното слушање. Така во иднина тој ќе биде добар слушател со кој другите ќе се чувствуваат ценети.
- Ќе го збогати својот речник
Бројни студии покажале дека многу мали деца на кои родителите им читале приказни подоцна можеле да разберат повеќе зборови отколку бебињата на кои не им се читало. Резултатите од едно истражување покажале дека рецептивниот речник кај децата се зголемил за 40 отсто, додека бројот во групата во која не се читало, била 16 отсто.
- Ќе ја развие фантазијата
Читањето ја поттикнува нашата имагинација, па разбирливо е што ја развива фантазијата и кај децата. Колку повеќе им читаме на нашите деца, толку им станува полесно да ги замислат зборовите и приказните што ги слушаат. Овој постојан тренинг на мозокот ја подобрува способноста на детето да замислува и да биде покреативно и отворено за нови идеи.
Ќе научи што е емпатија
Се покажало дека емпатијата и читањето одат заедно. Кога родителите им читаат на децата или кога малку постарите сами читаат приказни, тие имаат можност да ја видат и искусат таа приказна од аголот на ликот. На тој начин можат да разберат што се случува со хероите, да ги почувствуваат нивните искуства и да ги разберат нивните чувства.
- Подобро ќе комуницира со другите
Читањето ја подобрува способноста на детето да се вклучи и да комуницира. Притоа, се случува децата често да ги прекинуваат родителите со разни прашања додека им читаат, но тоа всушност е многу добра работа. Обидете се да одговорите на сите прашања на детето, а исто така можете да го поврзете она што се случува во приказната со нешто што ви се случило. Помогнете му на вашето дете и тоа да се вклучи прашувајќи го како се чувствува некој лик или што може да се случи следно.
- Ќе развие љубов кон читањето
Ако почнете да им читате на децата уште додека се мали, тие ќе развијат страст за книги и читање. А тоа значи дека ќе ги сакаат подоцна, можеби повеќе од видео игрите и телевизијата, што дефинитивно е плус.
