Помеѓу првата и третата година, детето треба да спие од 12 до 14 часа, во текот на 24 часа. Според педијатрите, доволната количина сон е исклучително важна, бидејќи во спротивно последиците не се само лошо расположение, раздразливост и плачење, туку неспиењето може да се одрази и на концентрацијата, способноста за учење и способноста на имуниот сиситем да се одбрани од вируси и сите останати причинители за болести.
Кога ќе наполни 18 месеци, 1-2 дремки во текот на денот ќе ги замени со едно спиење во траење од еден до три часа. Тоа спиење треба неколку часа да се одвои од вечерното легнување во кревет, оти во спротивно, вечерното заспивање нема да оди лесно.
Многу фактори може да доведат до проблеми со спиењето. Децата на оваа возраст полека тежнеат кон осамостојување и напредокот на нивното моторно, осознавачко и социјално функционирање секако влијае на спиењето. Стравот од одвојување, потребата за автономија и развојот на нивната имагинација исто така влијае на проблемите со спиењето.
Она што е значајно е да се воспостави ритам на редовно спиење и да се држите до распоредот. Истовремено е важно да изградите добри навики на успивање и најдобро е детето да се навикне само да се успива и заспива.
Децата од предучилишна возраст имаат потреба од вкупно 11 до 13 часа спиење секој ден, сметајќи го ноќното и дневното спиење.
Како и кај помалите деца, тешкотиите при успивањето и будењето ноќе и натаму се присутни. Со понатамошниот развој на имагинацијата, се случува, децата на оваа возраст да развијат ноќни стравови. По наршување на пет години, повеќето од децата престануваат да спијат во текот на денот.
Со почнувањето на училиште, децата ја губат можноста за пладневна дремка и одмор. Затоа е многу е важно во овој период, познавајќи го своето дете, да забележите ако му недостасува спиењето во текот на денот и да се потрудите навечер да легнува порано и во текот на викендите да отспие попладне, за да го надомести сонот што ми недостасува.
Педијатрите обично не прашуваат колку спие детето, оти очекуваат родителот сам да каже ако има потреба. Затоа, при посета на матичниот педијатар задолжително напоменете му дека вашето дете не спие доволно. Како и на помала возраст, така и во овој период е важно да се одржува редовен ритам на спиење и да се држите до распоредот. Детето треба секоја вечер да си легнува во исто време и наутро во исто време да станува, и тоа не само преку работните денови, туку и за викендите.
