На тригодишна возраст, говорот на децата сè уште активно се развива. Детето би требало да зборува веќе некое време, но не е важно само да прозборело, туку треба да знае и одреден број зборови за да се вклопи во рамките на правилниот говорно-јазичен развој.
Дете од три години треба да знае повеќе од 500 зборови, но бидејќи е тешко да се изброи дали вашето малечко знае толку многу зборови, можете да го следите неговиот говорно-јазичен развој и на други начини.
Да речеме, промената што треба да ја забележите на оваа возраст е тоа да составува сè подолги реченици.
Слушајте ги речениците што ги кажува вашето малечко и запишете некоја од најдолгите. Можете да го правите ова неколку пати неделно или месечно и да забележите како речениците стануваат сè подолги.
Она што е позабележително – и многу забавно – вашето тригодишно дете ќе почне да ви раскажува приказни за работи што се случиле, како на пример како било во градинка и слично.
Колку зборови разбира едно 3-годишно дете
До тригодишна возраст, или цели 36 месеци живот, децата го учат значењето на повеќе од 3.000 зборови! Ова значи дека на оваа возраст веќе разбираат многу. Тие научиле некои рутини и веќе знаат што да очекуваат во зависност од околностите. Тие ги знаат зборовите или имињата на предметите што ги гледаат секој ден, но и имињата на некои работи што ги виделе само неколку пати. Тригодишно дете треба да одговара на прашања и во повеќето случаи да ги следи упатствата што му ги давате.
Доколку сте загрижени за говорот на вашето дете од која било причина, најдобро е да побарате совет од логопед.
