Конјуктивитис е воспаление на тенката проѕирна мембрана – слузокожа, која ја обложува внатрешната површина на очните капаци и видливиот бел дел на очното јаболко. Воспалителниот процес обично се развива на двете очи, а може да се случи прво да се појави на едното, а за еден до два дена и на другото око. Исто така, можно е воспалението да помине асиметрично, односно да биде силно изразено на едното, а значително помалку на другото око.
Во двата случаи се развива црвенило на окото, чувство на гребење, печење и засилено создавање на секрет. При бактериски инфекции се создава секрет кој е густ, жолт, понекогаш и зеленкаст и личи на гној. Наутро, очните капаци се затворени со тој секрет, кој преку ноќ се суши на краевите на капаците.
И во случај на вирусен конјуктивитис се појавува црвенило, печење, оток на капаците и засилена секреција, но во овој случај, секретот е водлест. Очите се полнат со солзи. Често вирусниот конјуктивитис е придружен со кивање или кашлање, што ги предизвикува истиот вирус.
Лесните бактериски инфекции се третираат со антибиотска терапија во траење од неколку дена, додека вирусните воспаленија имаат свој процес од една до две недели, на кои не може да се влијае.
