Инфекцијата на очите, конјунктивитис, често се јавува кај малите деца. Обично е многу заразен, поради што често се шири на цели групи во градинките или се пренесува помеѓу децата во парковите. Но, постарите деца и возрасните исто така може да добијат конјунктивитис.
Конјунктивитисот е всушност воспаление на конјунктивата, односно склерата и внатрешниот очен капак. Иако обично не е опасна инфекција, може да изгледа прилично лошо, а често ги загрижува родителите.
Сепак, доколку забележите симптоми на конјунктивитис кај детето, важно е да го однесете на лекар, бидејќи во некои случаи ова воспаление поминува само по себе, а понекогаш е потребен третман.
Како се добива конјунктивитис
Инфективниот конјунктивитис (кој е заразен) може да биде предизвикан од разни бактерии и вируси кои доведуваат до настинки и други инфекции, како што се инфекции на увото, синусни инфекции, болки во грлото… Понекогаш може да биде предизвикан од истите видови бактерии кои водат до кламидија и гонореја, полно преносливи болести.
Некои типови на конјунктивитис не се заразни:
- Алергиски конјунктивитис, кој се јавува почесто кај деца кои имаат алергии, како што е поленската треска. Предизвикувачи се тревата, поленот од амброзија, животинскиот првут, грини…
- Надразнувачки конјунктивитис, кој е предизвикан од сè што го иритира окото, како што е загаден воздух или хлор во базените
Симптоми на конјунктивитис
Покрај вообичаеното црвенило или розева боја што се појавува на окото, децата често може да се чувствуваат како да им влегол песок во окото. Често се јавува и исцедок од окото, како и болка и отекување на конјунктивата. Кај некои деца се забележува и отекување на очните капаци и чувствителност на светлина.
Конјунктивитис може да се појави на едното или на двете очи.
Кога станува збор за алергиски конјунктивитис, чешање и насолзени очи се вообичаени симптоми, пишува kidshealth.org.
Пренесување на конјунктивитис
Конјунктивитисот е заразен ако е предизвикан од бактерии или вируси. Кога причината е бактерија, овој тип на конјунктивитис е заразен веднаш штом се појават симптомите и се додека има исцедок од окото – или до 24 часа по започнувањето на антибиотскиот третман.
Кај конјунктивитисот предизвикан од вирус, ова воспаление е заразно пред да се појават симптомите и се додека симптомите траат.
Третман
Конјунктивитис предизвикан од вирус обично поминува сам по себе, без никаков третман, а во случај на конјунктивитис предизвикан од бактерии, се користат капки со антибиотици или маст за очи.
Кога станува збор за ублажување на симптомите, ладните или топлите облоги на очите можат малку да ја ублажат непријатноста во очите. Нежно исчистете ги рабовите на заразеното око со топла вода и памук за да ги отстраните стврднатите остатоци од исцедокот и да спречите залепивање на очните капаци по будење.
Кога треба да посетите лекар
Ако конјунктивитисот не поминува по два или три дена од почетокот на третманот или по една недела без третман, однесете го детето на лекар.
Ако забележите оток во окото на вашето дете, црвенило на очните капаци и околу очите и покачена температура, одете на лекар. Овие симптоми може да укажуваат на тоа дека инфекцијата се шири надвор од конјунктивата и дека е потребен третман.
