Детето треба да знае дека сите негови емоции се во ред, но дека сите однесувања не се. Целта на родителите треба да биде да му дозволат на детето да ги почувствува сите емоции, но да го научат како да ги изразува и да се однесува во согласност со нив. Однесувањето на детето е секогаш негов начин на комуникација со нас, истакнува психологот Џесика Вандер-Виер. Родителството е предизвикувачко патување, а многу популарни совети не функционираат бидејќи често им недостасуваат два важни елементи, а тоа се љубопитноста и рефлексијата на она што се случува. Ова се некои од нив.
Треба да добие по задникот, па повеќе нема тоа да го прави
Ваквите физички казни кај детето создаваат страв од сопствените родители и не го учат на нови вештини, туку често го доведуваат до уште поголеми борби со однесувањето. Наместо тоа, обидете се да откриете зошто детето се однесува така, кои нови вештини треба да ги научи за да започне поинаку да комуницира.
Само бара внимание, пушти го
Барањето внимание е природна човечка потреба. Кога детето сака да се поврзе со своите родители, а другите методи не функционираат, тогаш се впушта во проблематично однесување. Замислете како би се чувствувале вие доколку партнерот ве игнорира, а вие имате потреба од него. Тоа секако би влијаело на вашето однесување и на целиот однос.
Нека се исплаче, па ќе заспие
Една од најголемите причини за борбата на детето со спиењето е непријатноста поради разделбата. Одвоеноста од родителите на толку долг период може да биде тежок. Вашето дете во секој момент треба да знае дека сте поврзани, дури и кога сте разделени. Разговарајте за тоа во текот на денот и пред спиење, смислете мали ритуали кои ќе му помогнат да го надмине стравот.
Испрати го во соба, па ќе научи да биде послушно
Каква лекција ќе научи детето ако го испратите во собата? Собата ќе почне да ја поврзува со казна, а не со место за игра и одмор. Нема да научи ниту некој нов начин на комуникација или регулирање на емоциите. Наместо тоа, фокусирајте се на однесувањата што сакате да ги промените и разговарајте со вашето дете за нив пред да се појави предизвикувачка ситуација.
Само игнорирај го и ќе престане
Со игнорирање на детето, нема да му покажете што не е во ред во неговото однесување и што треба да направи наместо тоа за да ги задоволи неговите потреби. Наместо тоа, запрашајте се како ова однесување му служи и какви нови вештини треба да го научите за подобро да ги изрази своите потреби.
