Мајчинството е најубавиот дел од животот на многу жени, но понекогаш може да биде многу стресно и исцрпувачко. Покрај партнерите, на мајките можат да им помогнат и сите околу нив, било да се тоа родители или блиски пријатели. Повеќето од нив никогаш нема да побараат помош од други луѓе, но сигурно ќе ценат да им биде понудена помош. Еве неколку совети за тоа што можете да направите за да им помогнете на мајките по породувањето.
Понудете се да им помогнете во домашните работи
Многу мајки поради умор, исцрпеност и недостаток на време едноставно не успеваат да ја одржуваат куќата чиста и уредна како што би сакале. Можете да им понудите помош во чистење, без разлика дали се работи за една соба или целиот дом. Но, внимавајте како нудите помош. Немојте да ги вознемирите и да им кажете дека нивниот дом е неуреден бидејќи тоа може да ги повреди и засрами.
Можете да понудите да ја испразните машината за перење или да ги ставите алиштата за перење, сè што вие самите би сакале некој да направи за вас. Ако не сакате да ги ставите во непријатна ситуација, можете да им понудите помош уште пред да пристигнете. Прашајте ги дали им треба помош и кажете им дека сте на располагање.
Донесете им свежи намирници или понудете им да им подготвите ручек
Не мора да бидете најдобриот готвач на светот за да понудите да подготвите оброк за некој ваш близок. Ако веќе не сте некој што сака или знае да готви, можете да прашате каква храна да купите во продавница или да донесете свежо овошје и зеленчук. Мајките сигурно ќе го ценат овој гест, особено оброкот што не морале сами да го подготвуваат.
Понудете се да ги чувате децата
По враќањето од породилиште, мајките често немаат време да се грижат за себе на почетокот. Кога ќе ги посетите, понудете им да ги причувате или да го држите бебето за да можат да се истушираат, да дремнат или да одат до трговскиот центар ако им треба нешто. Дури и да одбијат, сигурно ќе ја ценат понудата и ќе ве контактираат во иднина доколку имаат потреба да им се причува бебето.
Погрижете се таа да се чувствува сакана
Доколку првпат доаѓате во посета откако мајката со бебето се вратила од породилиште, погрижете се да во подароците има нешто и за неа. Тоа може да биде симпатична корпа со неколку корисни производи, како што се миризлив гел за туширање, путер за тело или пилинг. Можете да и ги купите и нејзините омилени производи за нега на кожа.
Покрај подароците, на мајките можете да им помогнете и со тоа што ќе се грижите за нивното ментално здравје. Почетокот со мало бебе може да биде многу стресен, а охрабрувачките пораки како „Можеш да го направиш тоа! Јас сум со тебе“, ќе ѝ значат многу. Овој мал гест има неверојатно влијание врз мајките за да не се чувствуваат сами и да знаат дека покрај своето бебе, има и такви кои мислат и на нивната благосостојба.
