Бразилскиот сој на коронавирус – P1, одговорен за зголемувањето на смртноста од Ковид-19 во оваа латиноамериканска земја, мутира на начин што ќе го овозможи полесното избегнување на антителата, покажало бразилско научно истражување.
Истражувањето на варијантата или сојот што циркулира во Бразил, спроведена од Институтот за јавно здравје Фиокруз, открило мутации во областа што се користи за влез и заразување на човечките клетки.
Оттука, мутациите, предупредуваат бразилските научници, може да го направат вирусот поотпорен на вакцините, со потенцијални сериозни последици врз ширењето на болеста во најнаселената нација во Латинска Америка.
„Веруваме дека ова е уште еден механизам за криење што го создава вирусот со цел да го избегне одговорот на антителата“, рече Фелипе Навека, еден од авторите на студијата од Фиокруз во амазонскиот град Манаус, од каде што се верува дека тргнала варијантата P1.
Навека рече дека промените изгледаат слични на мутациите забележани во уште поагресивната јужноафриканска варијанта, против која, како што покажаа некои студии, некои вакцини имаат значително намалена ефикасност.
Мутациите, предупредуваат бразилските научници, може да го направат вирусот поотпорен на вакцините, со потенцијални сериозни последици врз ширењето на болеста
„Ова е особено загрижувачки бидејќи вирусот продолжува да ја забрзува својата еволуција“, додаде тој.
Истражувањето покажало дека варијантата P1 е дури 2,5 пати позаразна од изворниот коронавирус и поотпорна на антитела.
Се смета дека варијантата, која брзо стана доминантна во Бразил, е главен фактор за зголемената смртност.
Епидемискиот бран во Бразил се повеќе ги погодува и помладите луѓе, а болничките податоци покажуваат дека во март, повеќе од половина од сите пациенти биле на возраст под 40 години.
