Луѓето кои имале Ковид-19 имаат зголемен ризик од развој на сериозно згрутчување на крвта до шест месеци по инфекцијата, дури и во благи случаи, покажала студијата објавена оваа недела.
Претходните истражувања покажаа дека Ковид го зголемува ризикот од згрутчување на крвта, но новата студија, објавена во медицинското списание BMJ покажува колку долго може да трае заканата.
Дури и луѓето кои имале блага форма на болеста за која не била потребна хоспитализација имале поголем ризик од белодробна емболија и длабока венска тромбоза
За да откријат, истражувачите ги споредиле податоците на повеќе од милион луѓе во шведските национални регистри кои се заразиле со Ковид-19 од февруари 2020 до мај 2021 година, со контролни групи од над четири милиони кои не биле позитивни.
Тие откриле дека оние со Ковид имаат поголем ризик од белодробна емболија, крвен згрушок што ги блокира артериите во белите дробови, до шест месеци по инфекцијата.
Постоела и зголемена опасност од длабока венска тромбоза, крвен згрушок што обично се наоѓа во нозете, до три месеци по инфекцијата со Ковид.
По разгледувањето на голем број фактори, тие откриле 33 пати поголем ризик од белодробна емболија кај оние кои имале Ковид, како и петкратно зголемување на ризикот од длабока венска тромбоза.
Луѓето кои имале тешки симптоми на Ковид и оние со такви здравствени состојби од претходно, биле изложени на поголем ризик, покажала студијата.
Но, дури и луѓето кои имале благи случаи за кои не била потребна хоспитализација имале поголем ризик од белодробна емболија и длабока венска тромбоза.
- Шансите за формирање на крвни згрушоци биле поголеми за време на првиот бран на пандемијата отколку во подоцнежните фази, што според научниците се должи на покриеноста со вакцини и подобриот третман како што одминува времето
Истражувачите рекоа дека нивните наоди имаат „големи импликации врз здравствената политика“, повикувајќи на дополнителен третман за спречување на згрутчување на крвта, особено кај случаи со висок ризик.
Тие исто така нагласија дека нивните резултати ја истакнале важноста на вакцинацијата.
