♦♦♦♦♦♦♦
Маските можат да го отежнат влегувањето на воздухот во белите дробови, може да предизвикаат напади на астма кај некои пациенти и исто така може да предизвикаат анксиозност што го менува начинот на дишење кај луѓето
Луѓето кои имаат астма или други состојби поврзани со белите дробови не треба да носат заштитна маска за лице ако тоа им го отежнува дишењето, велат експертите.
Британската влада ги советува луѓето да носат маски само ако се излезени на места каде што е тешко да држат најмалку два метри дистанца од другите луѓе. Ова е затоа што коронавирусот е респираторен вирус, што значи дека ги инфицира луѓето кога се вдишува и се прицврстува на клетките во дишните патишта и белите дробови.
Но, на луѓето кои имаат астма или болести како што се хронично опструктивно белодробно заболување (COPD) или цистична фиброза, може да им биде тешко да дишат преку маска.
Маските можат да го отежнат влегувањето на воздухот во белите дробови, може да предизвикаат напади на астма кај некои пациенти и исто така може да предизвикаат анксиозност што го менува начинот на дишење.
Експертите велат дека луѓето треба да носат маска за да се заштитат себеси и другите околу нив, но не и да го ризикуваат сопственото здравје во процесот.
Во своите официјални препораки, британските власти велат: „Ако можете, носете маска за лице во затворен простор каде што не е можно социјално дистанцирање и каде што ќе дојдете во контакт со луѓе што вообичаено не ги сретнувате. Ова се однесува најмногу на кратки периоди во затворен простор, преполни места со луѓе, на пример, во јавен превоз или во некои продавници.“
Респираторни состојби се болести кои влијаат на дишењето како што се: астма, хронично опструктивно белодробно нарушување, цистична фиброза, хроничен бронхитис, емфизем или карцином на белите дробови
Но, понатаму се додава: „Маските за лице не треба да ги користат деца под 2-годишна возраст или оние на кои им е тешко да ракуваат правилно со нив. На пример, мали деца без асистенција или оние со респираторни состојби.“
Респираторни состојби се болести кои влијаат на нечие дишење како што се: астма, хронично опструктивно белодробно нарушување, цистична фиброза, хроничен бронхитис, емфизем или карцином на белите дробови.
Носењето маска, велат експертите, може да го отежни влегувањето на воздухот во белите дробови и да ги влоши симптомите на овие состојби.
Од „Астма Велика Британија“ велат: „За некои луѓе со астма, носењето на маска на лицето може да не биде лесно. Може да им го отежне дишењето. Владата советува дека луѓето со респираторни состојби не треба да носат маски за лице, па ако ви е тешко, тогаш немојте да ги носите“.
Д-р Пурви Парих, алерголог во непрофитната мрежа „Алергија и астма“, рече дека луѓето со белодробни заболувања, оние со абнормалности на кожата на лицето или вратот, или деца, или лица со деменција можеби нема да можат редовно да ги носат заштитните маски за лице.
Оние кои имаат проблеми со дишењето може да почувствуваат влошување на симптомите поради покривање на устата и носот, рече таа.
Д-р Парих за MailOnline изјави: „Луѓето со заболувања на белите дробови се соочуваат со парадокс – ним маската најверојатно им треба повеќе отколку на просечна личност, но може да биде предизвик да дишат со неа“.
„Припиена маска на лицето може на секој да му направи проблеми со дишењето. Се приближуваме кон летото, па е жешко надвор, а кога постојано дишете топол воздух од вашиот сопствен здив може да биде доста непријатно. За некои астматичари топлиот воздух е тригер и може да предизвика напади на астма.“
Таа вели дека медицинските заштитни маски не се неопходни за другите луѓе и треба да бидат резервирани за медицинскиот персонал. Ова се совпаѓа со препораките на CDC кои велат дека луѓето треба сами да си направат заштитна маска за лице отколку да купуваат специјални. (Дејли мејл)
