Нова американска студија сугерира дека децата помлади од пет години заразени со варијантата омикрон имаат помал ризик од сериозни здравствени исходи од оние деца кои се инфицирани со варијантата делта.
Резултатите од оваа кохортна студија сугерираат дека стапката на инциденца на инфекција со SARS-CoV-2 со варијантата омикрон била 6 до 8 пати поголема од онаа на варијантата делта кај деца помлади од 5 години, но тешките клинички исходи биле поретки отколку со варијантата делта
Рецензираната студија, спроведена од истражувачите од Универзитетот Кејс Вестерн Резерв (CWRU) во Охајо, е првиот голем истражувачки напор за споредба на здравствените исходи од инфекцијата со овие варијанти кај деца на возраст под пет години.
Авторите велат дека наодите се значајни со оглед на тоа што оваа возрасна група сè уште не е подобна за вакцини за КОВИД-19 и има ограничен веќе постоечки имунитет.
Студијата, објавена во списанието „JAMA Pediatrics“, исто така покажала дека варијантата омикрон е 6-8 пати позаразна од варијантата делта.
„Бидејќи толку многу невакцинирани деца беа заразени, долгорочните ефекти на инфекциите со Ковид-19 врз мозокот, срцето, имунолошкиот систем и другите органи на децата остануваат непознати и загрижувачки“, рече истражувачот Ронг Ксу од Медицинскиот факултет на Универзитетот Кејс Вестерн Резерв, Кливленд, Охајо.
Тешките клинички исходи се движеле од 16 отсто помал ризик за посета на итната медицинска помош до 85 отсто помал ризик за механичка вентилација. Околу 1,8 отсто од децата заразени со омикрон биле хоспитализирани, во споредба со 3,3 отсто со делта.
За студијата, тимот ги анализирал електронските здравствени досиеја на повеќе од 651.640 деца во САД кои имале медицинска средба со здравствени организации помеѓу септември 2021 и јануари 2022 година, вклучувајќи повеќе од 22.772 деца заразени со омикрон кон крајот на декември и крајот на јануари во споредба со повеќе од 66.000 деца заразени есента, кога доминираше делта. Студијата, исто така, ги споредила податоците на повеќе од 10.000 деца непосредно пред откривањето на омикрон во САД, кога делта сè уште беше доминантна.
Децата помлади од пет години сè уште не ги исполнуваат условите за вакцина против Ковид-19 и имаат ниска стапка на претходни инфекции со САРС-КоВ-2, што го ограничува нивниот веќе постоечки имунитет.
Тимот ги испитувал клиничките здравствени исходи за педијатриските пациенти за време на 14-дневен период по инфекцијата со САРС-КоВ-2. Тие ги прегледале посетите во собата за итни случаи, хоспитализацијата, приемите во ICU и употребата на механичка вентилација.
Понатамошната анализа на демографските податоци покажала дека децата заразени со омикрон биле во просек помлади и имале помалку коморбидитети.
