Кај некои пациенти со Ковид-19, симптомите на болеста може да траат со месеци по првичната инфекција. Новите докази сугерираат дека ова може да биде последица на тоа што вирусот прави значителни промени во крвта на луѓето, што резултира со трајни промени во крвните клетки кои се уште се евидентни неколку месеци по дијагностицирањето на инфекцијата.
„Успеавме да откриеме јасни и долготрајни промени во клетките, за време на акутната инфекција, па дури и после неа“, објаснува биофизичарот Јохен Гак од институтот „Макс Планк“ во Германија.
Во новата студија, Гак и неговите колеги истражувачи ја анализирале крвта на пациентите користејќи систем наречен RT-DC, кој може брзо да анализира стотици крвни клетки во секунда, притоа откривајќи какви било абнормални промени во големината и структурата. Овој систем помага да се открие како коронавирусот влијае на крвта и тоа на клеточно ниво.
„Иако патологијата сè уште не е разбрана целосно, хипервоспалителниот одговор и нарушувањата на коагулацијата кои доведуваат до запушување на микроваскуларните крвни садови се сметаат за клучни двигатели на сè уште зголемениот број на смртни случаи“, напишаа истражувачите, предводени од авторката на студијата Маркета Кубанкова.
„Досега не се сметаше дека физичките промени во крвните клетки играат важна улога кога станува збор за васкуларна оклузија и оштетување на органите предизвикани од Ковид-19“, додаваат истражувачите.
Забележани промени во големината и структурата на крвните клетки
Студијата опфатила 55 пациенти. 17 од нив имале тешка форма на болеста, а половина од нив подоцна починале. Во студијата биле вклучени и 14 пациенти кои се опоравиле од Ковид-19, како и 24 здрави волонтери. Анализирани се повеќе од четири милиони крвни клетки, а резултатите покажале дека големината на црвените крвни клетки (еритроцити) кај пациенти со Ковид-19 била значително поразлична. Забележани се и знаци на вкочанетост во физичката структура на клетките, кои покажуваат помала деформабилност, што би можело да влијае на нивната способност да испорачуваат кислород низ телото, пренесува „Science alert“.
„Физичките својства на еритроцитите се клучни за микроциркулацискиот проток и како такви, овие промени можат да ја ослабат циркулацијата и да промовираат хипоксемија“, објаснуваат истражувачите.
„Досега не се сметаше дека физичките промени во крвните клетки играат важна улога кога станува збор за васкуларна оклузија и оштетување на органите предизвикани од Ковид-19“, велат истражувачите
„Ефектот би можел да се задржи кај пациентите долго време откако инфекцијата повеќе не е активна, и откривме дека кај закрепнатите пациенти промените во фенотипот не беа толку изразени, но сепак и понатаму беа присутни“.
Кај белите крвни клетки (лимфоцити), забележана e помала вкочанетост кај пациенти со Ковид, додека кај нив моноцитите биле значително повисоки отколку кај учесниците од контролната група. Во меѓувреме, неутрофилите, друг вид на бели крвни клетки, покажале бројни промени кај пациенти со Ковид. Забележани се промени во големината и некои поголеми деформации.
„Иако некои од овие промени се вратија во нормалните вредности по хоспитализацијата, другите опстојуваа со месеци по отпуштањето од болницата, доказ за долгорочниот ефект на Ковид-19 врз организмот “, пишуваат истражувачите.
„Претпоставуваме дека набљудуваните промени може да се должат на цитоскелетни промени во имунолошките клетки. Механичките својства на клетките можат да бидат директно поврзани со цитоскелетот, важна потпорна структура што исто така ја одредува клеточната функција“, велат тие.
Сè уште не е целосно јасно како промените во крвните клетки предизвикуваат симптоми на болеста, а понекогаш предизвикуваат и смрт. Студијата објаснува колку вирусот го напаѓа телото и зошто некои луѓе може да имаат симптоми на болеста со месеци по дијагнозата.
„Претпоставуваме дека трајните промени во физичките фенотипови на крвните клетки може да придонесат за долгорочно оштетување на циркулацијата и испорака на кислород кај опоравените пациенти“, велат научниците.
