Лебот е здрав во секојдневната исхрана поради житарките од кои се прави. Житарките содржат целулоза, многу корисно влакно кое ја олеснува работата на цревата бидејќи спречува запушување и ја одржува цревната флора. Ова својство на целулоза е особено важно за децата во првите години од животот, бидејќи дигестивниот систем сè повеќе ја запознава храната и мора да се справува со се повеќе барања. Но, има уште една предност на лебот. Ако детето јаде леб, ќе развие навика добро да џвака, што ќе помогне да се зајакнат непцата и слузокожата на усната шуплина да се навикне на потврда храна.
КОГА ДА СЕ ВОВЕДЕ ЛЕБ ВО ИСХРАНАТА?
Доколку кај вашето бебе не сте забележале алергија на одредени видови житарки, односно на глутен, можете да му понудите леб со навршени 6 или 7 месеци. Притоа важно е да се води сметка лебот да не содржи сол.
КАКОВ ЛЕБ ДА МУ СЕ ПОНУДИ НА БЕБЕТО?
Иако лебот од цели зрна е поздрав и побогат со хранливи материи од белиот леб, сепак е подобро на детето да му понудите бел леб, односно леб направен од рафинирано брашно. Причината за тоа лежи во фактот што големите количини на влакна во интегралниот леб не се погодни за мали бебиња.
Во пекарите денес може да се најдат разни видови леб, од оној кој се подготвува на традиционален начин до збогатен со семки.
Овие видови леб се многу вкусни и се побогати со хранливи материи од обичниот бел леб. Сепак, бидете повнимателни кога купувате леб, бидејќи многу пекарски производи денес се декларираат како ржан или интегрален леб, а во реалноста не се. Ваквите производи често содржат само семиња, а нивната основа е белото брашно кое е обоено со адитиви за да изгледа темно. Добар критериум за препознавање на интегрален или ржан леб е богатството и полноста на вкусот што потсетува на колач, потоа зрнестоста и лесна киселост. Ваквиот леб уште побрзо ќе ве засити. Секој леб што има лесен вкус како белиот леб, е премногу сунѓерест, исполнет со воздух и лесен, дури и ако е црн и посипан со семки, веројатно не е интегрален или или ‘ржан или ги содржи овие состојки во многу мал процент. Денес има алтернатива и за тоа. Многу семејства имаат домашни пекари за леб кои овозможуваат лесно и релативно брзо подготвување леб. Во вашиот домашен леб можете да ставите разни видови брашно, семки и сушено овошје и на овој начин точно да знаете што му нудите на вашето дете и семејството.
КОЛКУ ЛЕБ ДНЕВНО ДА МУ ДАДЕТЕ НА ДЕТЕТО?
На возраст до година и половина, доволно е детето да изеде 40 – 60 гр бел леб дневно, иако подобро е понекогаш да му понудите парче ‘ржан или црн леб.
Од втората година од животот, на вашето дете можете да му дадете леб направен од крупно мелено брашно, на пример пченкарен леб. Парче леб со путер ќе биде одличен појадок.
Во третата година, детето веќе може да јаде до 100 гр црн или бел леб дневно. Ова важи и за домашниот леб и печива.
