Носењето маска за лице, фабрички произведена или направена во домашни услови, односно носењето на лична заштитна опрема на устата и на носот веќе неколку дена е задолжителна за сите во земјава, во насока на спречување на ширењето на новиот коронавирус.
Но, лекарите предупредуваат дека во тој случај, со децата треба да се пристапува со внимание. Дали одлуката децата да носат маски на лице е разумна? Да, под одредени услови и по одредена возраст, порачува германското педијатриско здружение (БВКЈ).
За нашата маска да овозможи заштита на оние околу нас и како не би го изложиле лицето кое ја носи на зголемен ризик, потребни се две работи. Прво, маската мора целосно да го покрие лицето од коренот на носот до под брадата, и треба да е тесно припиена за кожата. Второ, еднаш кога маската ќе се стави на лице, не смее да се допира. Во случај со децата, вториот услов е посебно тешко да се исполни.
Помалите деца веројатно нема да ја допираат маската, единствено само ако родителите постојано ги предупредуваат – колку е детето помало, толку почесто ќе ја допира маската.
Поради тоа, здружението на педијатри на Германија, утврдило кои деца можат да носат маски, и тоа се оние постари од две години.
Постарите деца може да носат маски, барем во јавен превоз, во продавница…, порачуваат германските педијатри.
За време на играње на отворен простор, маската може да пречи или да биде дури и опасна – на пример нејзината елсатична трака може да се закачи за некаква препрека на отворен простор или за справа на детско игралиште, предупредуваат педијатрите.
Во Франција пак, каде од 11 мај се отвораат училиштата, сите ученици задолжително ќе мораат да носат маска за лице, со цел да придонесат во спречувањето на ширење на новиот коронавирус. Маските ќе бидат задолжителни за учениците од 11 до 18 години, а според соопштението од тамошното министерство за здравство, “невозможно е истата мерка да се спроведе кај помладите ученици и оние од градинка, односно кај децата на возраст од 4 до 11 години“.
