Некогаш причината е сосема безопасна, но може да биде знак и за некои сериозни болести. Може да биде знак за болести на устата, органите за варење, но и општи нарушувања во организмот. Важно е да се открие која е причината за оваа појава. Доколку кај детето се јави непријатен здив кој трае, потребно е детето да го прегледа педијатар и стоматолог.
Најчеста причина за непријатен здив од уста кај децата се инфекции на крајниците, грлото и синусите и носот. Постојаното слевање на секрет од носот е последица на алергиски реакции, хронични настинки или заболувања на синусите. Во рамките на актуелната инфекција може да дојде до размножување на бактерии кои даваат непријатен мирис од устата. Кога на детето му е затнат носот поради алергија, настинка или зголемен трет крајник, детето диши на уста што доведува до сушење на слузницата и изостанок на антибактериската улога на плунката. Бактериите брзо се размножуваат, предизвикуваат распаѓање и ослободување на непријатни мириси.
Лошата хигиена на усната шуплина е една од честите причини за непријатен здив. Децата јадат повеќе слатки и не сакаат да мијат заби, а и кога ги мијат, не го прават тоа на најправилниот начин и не го прават доволно долго. Понекогаш расипан заб може да биде причина за непријатен здив, а некогаш дури и болести на непцата кои, иако ретко, може да се сретнат и кај децата.
Доколку детето не пие доволно количина на вода, било да се занимава со спорт или има покачена телесна температура, поврашање или дијареа, кога се потребни течности повеќе од вообичаено, може при дехидрацијата да дојде до непријатен здив.
Децата до три години може да заглават ситен предмет во носот и ако не се забележи на време, а доволно е мал да не прави потешкотии со дишењето, може да доведе до таложење на бактерии.
Габичните инфекции може да бидат причина за непријатен здив, но тие не се јавуваат самостојно, туку во состав на пад на имунитетот, системска болест или долготрајна и честа употреба на антибиотици.
Гастроезофагеален рефлукс (ГЕР) – враќање на содржината од желудникот кон хранопроводот. Иако детето не покажува други тегоби, може да биде причина за лош здив. Кај повозрасните деца причина може да бидат и жиговина, киселина во желудникот, лошо варење.
Метаболните болести и дијабетесот може да бидат откриени токму преку лошиот здив како еден од присутните симптоми. За среќа, сериозните болеста се само во мал процент причина за непријатен здив, но педијатарот на преглед треба да ја открие причината за појава на непријатен мирис од устата на детето.
