Децата се опседнати со социјалните мрежи кои, иако може да имаат негативно влијание врз нив, од друга страна можат да ни дадат и некои вредни информации. Така, неодамна еден тинејџер во видео дискутирал што е токсичен родител, а видеото привлече стотици коментари. Еве што за повеќето од нив значи лош или токсичен родител.
Ги карат и критикуваат
Возрасните често не гледаат проблем во тоа да викаат на детето, иако обично не уживаат во тоа, но го сметаат за потребно или едноставно не знаат друг начин. Понекогаш им се излезе нешто како: „Не биди глуп/а“, „Зошто се однесуваш како мало дете?“, „Вклучи го мозокот“ и слично. Сите овие фрази денешните родители честопати ги слушале од своите родители и не ги сметаат за навреда.
Меѓутоа, децата ги сметаат за лоши оние родители кои викаат или користат грди зборови, навреди, се фокусираат на нивните маани или нешто лошо што направиле, а забораваат да ги пофалат за добрите работи или врлини. Тие истакнуваат дека сакаат родителите однапред и со љубезност да им побараат нешто што треба да направат.
Во коментарите наведоа и најомразените фрази што ги користат родителите:
- „ Оди да ја завршиш домашната!“
- „Измиј садови!“
- „Дали си глув/а?“
- „Дали си слеп/а, куртав/а?“
- „Ти реков!“
- „Кога ќе пораснеш, ќе сфатиш!“
- „Во мојот дом мораш да ги почитуваш моите правила!“
Не го забележуваат трудот и напорот
Често мајките и татковците им велат на децата дека без труд не можат ништо да постигнат во животот, а потоа забораваат да го пофалат детето за трудот ако нема резултати. Ретко кој родител ќе го пофали детето за тројка во училиште, без разлика колку се трудело. Токму затоа не е изненадување што децата од современата генерација велат дека родителите не ги пофалуваат доволно и дека сакаат да слушнат пофалби не само за најдобрите резултати, туку и за вложениот труд. Фразата што најмногу ги нервира е: „Зошто четворка, а не петка?“
„Нема врска што немаш максимален број поени на тестот, четворката е одлична оцена“ – тоа е она што децата сакаат да го слушнат.
„Имам 14 години и не можам да се сетам мајка ми да ме поддржала барем еднаш во животот“, е еден од тажните коментари на видеото.
Не ги почитуваат личните граници
Уште една работа што многу ги нервира децата и што ја сметаат за токсична е што родителите инсистираат вратите од детската соба секогаш да бидат отворени или одбиваат да почукат пред да влезат ако вратите се затворени. Тинејџерите истакнуваат дека им е многу непријатно кога родителите им влегуваат во соба додека се пресоблекуваат или снимаат видео за социјалните мрежи.
Ги игнорираат
Децата на социјалните мрежи велат дека родителите не им обрнуваат многу внимание на нивните проблеми или ги слушаат додека се видливо отсутни и само велат „аха, аха“. Потоа обично додаваат коментар како: „Но, ние пешачевме пет километри низ шума до училиште и никој не се жалеше!“
Тинејџерите ги сметаат за токсични оние родители кои ги игнорираат нивните желби и им наметнуваат свои мислења, на пример, во изборот на облека, спорт или идната професија.
„Зошто носиш црни, безлични панталони и не се грижиш за себе? Ти си девојка!“, цитира една тинејџерка свои родители во коментари.
Користат родителска контрола
Иако родителите го прават тоа од претпазливост и за да не поминуваат децата премногу време пред екранот, тинејџерите многу се нервираат кога им се ограничува времето за користење на телефонот. Не им пречи што родителите, на пример, ја следат локацијата преку уредите, туку што им ставаат ограничувања за симнување апликации и колку време можат да го користат телефонот. Најмногу ги мразат кога родителите ги читаат нивните разговори со другарите, а некои почнале дискусија дали мама и тато можат да ги читаат пораките преку родителската контрола на смартфонот.
„Мајка ми често го зема мојот телефон да провери“, „Не знам за вас, ама јас имам ограничување од еден час дневно и мајка ми потоа буквално ги блокира сите апликации“, пишуваа тинејџерите во коментари.
