Еден од најдобрите израелски медицински центри објави загрижувачка студија за долгорочните ефекти на инфекцијата со коронавирус, откривајќи дека излекуваните пациенти на возраст од 45 години на физичките тестови покажале резултати како да имаат 80 години.
Останатите компликации со кои се соочиле испитаниците вклучуваат потешкотии со спиењето, анксиозност и депресија
Околу 30 лица со просечна возраст од 45 години учествувале во истражувањето спроведено од Медицинскиот центар Бејлинсон, пишува „Тајмс оф Израел“. Три месеци откако биле официјално излекувани, од поранешните пациенти било побарано да изведат низа едноставни физички вежби во кои се покажале прилично лоши.
Не поминале ниту половина километар
Една од задачите било и пешачење шест минути и за тоа време тие поминале околу 450 метри, додека просекот за нивната возрасна група е околу 700 метри.
Нивниот учинок не бил ништо подобар ниту со чучневи. Учесниците на студијата успеале да станат и клекнат 14 пати за половина минута, потфрлајќи под нормата за дури 16 чучнувања. Истражувачите рекоа дека резултатите на оздравените од Ковид биле слични на нивоата на кондиција кои обично се среќаваат кај луѓе на возраст од околу 80 години. Иако примерокот од 30 лица е релативно мал за истражувањето, наодите на израелскиот тим потсетуваат на слична студија спроведена во Кина.
Слично истражување во Кина
Кинеската студија, објавена во медицинското списание „Лансет“ во јануари, се заснова на податоци од повеќе од 1.700 луѓе во Вухан, со просечна возраст од 57 години. Кинеските испитаници биле подложени на физички прегледи половина година по закрепнувањето од Ковид-19, а кај 63 проценти е откриено дека сè уште покажуваат замор или мускулна слабост. Кога станува збор за тестот од шест минути пешачење, до 29 проценти од учесниците не успеале да ја достигнат ниту долната граница на очекуваната физичка подготвеност за нивната возрасна група.
Останатите компликации со кои се соочиле испитаниците вклучуваат потешкотии со спиењето, анксиозност и депресија.
