Бебињата се раѓаат со вродена склоност кон слаткo, бидејќи таков е вкусот на мајчиното млеко. Подоцна постепено ќе ги усвојуваат другите вкусови, а тој процес отприлика тече вака.
Папилите на новороденчето одговорни за разликување на вкусовите не се распоредени само на јазикот (како кај возрасните), туку и по неговите усни. Природата тоа го уредила така за полесно да го најде патот до дојката и изворот на најскапоцената храна – мајчиното млеко.
Папилите за вкус почнуваат да се развиваат додека бебето е се уште во стомакот на мајката и тоа околу 20-тата недела од бременоста. Истражувањата покажуваат дека исхраната на мајката за време на бременоста може да влијае на развојот на овој осет кај бебето, бидејќи одредени вкусови преминуваат во плодовата вода, преку која бебето може да ги „проба“. Ако, на пример, сте консумирале многу овошје и зеленчук за време на бременоста, постои голема веројатност дека, кога малку ќе порасне, и на вашето бебе ќе му се допадне вкусот на овие намирници.
Папилите на новороденчето одговорни за разликување на вкусовите не се распоредени само на јазикот (како кај возрасните), туку и по неговите усни. Природата тоа го уредила така за полесно да го најде патот до дојката и изворот на најскапоцената храна – мајчиното млеко
Новороденчето се води од инстинкти
Штом ќе се роди, бебето инстинктивно се свртува кон градите на мајката, водено од мирисот и вкусот на нејзиното млеко. Со мала помош брзо ќе ја фати брадавицата и ќе почне да цица во ритам. На почетокот ќе се измори и ќе заспие по само неколку голтки. Меѓутоа, со тек на време ќе зајакне и ќе се зголеми капацитетот на неговиот желудник, па ќе може да цица и поголема количина млеко. Инаку, мајчиното млеко е единствената храна која ниту едно бебе нема да ја одбие.
Светската здравствена организација (СЗО) не препорачува воведување нови вкусови во исхраната на бебето се додека не наполни шест месеци, бидејќи до таа возраст нивниот дигестивен систем не е доволно развиен за да се „справи“ со други работи за варење освен мајчиното млеко. Освен тоа, ниту неговото сетило за вкус не е подготвено за нова храна, па најверојатно ќе исплука се што е различно од единственото што го познава.
