Кога бебето покажува напредок во развојот на моториката, како ротирање на стомак, подигање на рачињата во стомачна положба, многу лесно ќе го забележите, бидејќи е очигледен. Но, препознавањето на емоциите на бебето и знаците на љубов и приврзаност кон вас, не е така едноставно, но е можно. Еве што експертите велат како да ги препознаете моментите кога бебето сака да ви “каже“ дека ве сака, како и изрази на лицето и движења со кои тоа го покажува.
Го следат вашиот глас
Малите бебиња покажуваат дека се во процес на поврзување со тоа што се вртат кон гласовите што најдобро ги знаат и ги сакаат. Веќе во 16-тата недела од бременоста ги слушаат мама, тато, браќата и сестрите. Токму поради оваа причина, важно е родителите да го започнат процесот на поврзување преку разговор и читање со бебето додека е сè уште во матката. До моментот кога ќе се роди, новороденчето ќе биде запознаено со најважните гласови во неговиот живот и едвај ќе дочека да може да се поврзе. Иако не може да зборува, може да комуницира со погледот, може да се превиткува и да ја движи главата од една страна на друга.
Гледање во лице
Документирано е дека бебињата се подготвени за барање лица, а една неодамнешна студија сугерира дека доенчињата на возраст од четири месеци можат да препознаваат лица еднакво како и возрасните. Но, најмногу ќе ги проучува лицата на мама и тато. Некои психолози сметаат дека тоа го прават за да се уверат дека можат да ви веруваат. Бебето испраќа сигнали кои сака да ги утврди, сака утеха и емотивен одговор. Кога ќе му возвратите погледот и ќе го погледнете со љубов, тоа гради врска полна со доверба помеѓу вас и бебето. Меѓусебното гледање во очи, му помага брзо да научи да ви верува и сака да го развие својот однос со вас. Ако родителите или старателите не возвратат и не го гледаат бебето со емоции на лицето, доенчето не развива чувство на доверба, па заклучува дека неговите потреби нема да бидат задоволени. Дури и да се добро нахранети, тоа нема да биде доволно, бидејќи им е потребна емотивна поврзаност.
Уживаат во близина на вашето тело
Веднаш по раѓањето, бебињата учат да го препознаваат мирисот кој е важен за нивниот опстанок, а тоа изворот на храна. Но, во игра е повеќе од основниот инстинкт; веќе од првата минута, бебињата сакаат да развијат емоционални врски. Отчукувањата на срцето и уникатните движења на мајката се веќе втиснати во мозокот на детето при раѓањето, што го прави да се чувствува безбедно во нејзината прегратка. Значи, кога вашето бебе забележително ќе се опушти во вашите раце и ќе се смести во положба за гушкање, тоа е нејзин начин да каже дека ве знае и ви верува. Колку бебињата доследно добиваат топлина, храна и утеха од своите родители, толку повеќе ќе одговараат на нивните прегратки со смиреност и повремено гушкање за да ви се доближат.
Ви упатуваат знаци
И не се работи само за плачење, бебињата сакаат да ви кажат дека се присутни на овој свет со секој звук што го испуштаат. Ова е само уште еден начин на кој бебињата се обидуваат да развијат врска со вас. Одговарајќи на нивните сигнали, развивате комуникација, што прави бебето да се чувствува важно и ја зајакнува поврзаноста со вас.
Ви се смешкаат
Не ја минимализирајте првата насмевка на вашето дете мислејќи дека била случајна. Возвраќајќи им со насмевка (можете ли да оддолеете?), тоа знае дека сте одговориле на нејзината потреба да комуницира.
Како и во секоја врска, ако сакате вашето бебе да ви покаже љубов, дајте му до знаење колку го сакате. Бебињата се програмирани да се заљубуваат, а родителите кои се заљубени во своите мали бебиња ќе имаат бебиња кои се заљубени во нив.
