“Мамо, ме боли стомакот“, зборови кои децата често ги изговараат. Зошто токму оваа реченица? Не е необично за децата да се жалат на болка во стомакот на почетокот на училишната година, пред испит или некоја изведба – кога стресот и анксиозноста се на многу повисоко ниво. Иако некои родители нема да се загрижат поради тоа, други ќе се чувствуваат несигурно како да го решат проблемот со болката кај детето.
Д-р Никол Патамануч, гастроентеролог од Детската болница во Сиетл, објаснува кои болки во стомакот се поврзани со стрес и анксиозност, но и кои симптомите треба да ги загрижат родителите.
Според истражување за болките во абдоменот во детската возраст, хроничната болка е вообичаен проблем во детството, со зачестеност на пореметувањето од 0,3 до 19% кај училишните деца во САД и Европа. Но, кај речиси 90% од овие деца не постои дијагностицирана болест поврзана со овие симптоми.
“Лицата со функционални болки во стомакот (болки без точна причинска дијагноза) имаат пречувствителен нервен систем поради претходни животни случувања, претходни операции, акутни инфекции или нетолеранција на храна“, вели д-р Патамануч.
Според него, постојат многу деца со функционални болки во стомакот.
“Овие деца добро јадат и добиваат нормално на тежина. Чувствуваат болка, а во целина функционираат добро, одат во училипте и спијат навечер. На првата посета, децата кои имаат болка во стомакот со симптоми како констипација, пролив, мачнина или повраќање, лекарот секогаш ги прашува родителите дали главен фактор е стресот. Тоа вклучува стрес дома, во училиште и во друштвото“вели тој.
Околу половина од родителите обично се свесни дека нивните деца проживуваат многу стресови, но сакаат да потврдат кај лекар дека детето нема никаков медицински проблем. Другата половина не поврзува дека стресот може да биде поврзан со болката. Симптоми кои покажуваат голема дисфункција се причина за загриженост. Многу е важно, според лекарите, да се мине низ медицинска проверка.
