Цели на истражувањата се да се утврди зошто кај некои пациенти имуниот систем не успева да се справи со КОВИД-19 инфекцијата во почетните фази, дали може да се предвиди текот на болеста и дали евентуално би можело да се интервенира за да се превенира тежок облик или несакан исход од истата
Унивeрзитетската клиника за хематологија-Скопје со задоволство информира дека во сериозна конкуренција од 38 меѓународни поднесоци на научно-истражувачки проекти во областа на КОВИД-19, проектот од Клиниката предводен од проф. д-р Ирина Пановска-Ставридис е одобрен и избран да биде финасиран во следните 2 години од Меѓународниот центар за генетски инжинеринг и биотехнологија (ICGEB) во Трст, Италија.
Станува збор за заеднички проект подготвен во соработка со еминентните експерти, акад. д-р Димитар Ефремов, кој раководи со Одделот за молекуларна хематологија во ICGEB), д-р Милена Стефановиќ и д-р Илир Демири од ЈЗУ Клиниката за инфективни болести и фебрилни состојби, академик д-р Александар Димовски од Центарот за генетски инжинеринг и биотехнологија од Македонската академија за наука и уметности (МАНУ), доц. д-р Венко Филипче, Министерство за здравство на РСМ.
„Овој меѓународно поддржан проект ни дава шанса да се вклучиме во глобалната научна борба за справување со пандемијата КОВИД-19 и покажува дека во мала земја како нашата е препознат потенцијал за научно-истражувачка работа“, вели вон. проф. д-р Ирина Пановска-Ставридис, медицински директор на ЈЗУ Универзитетска клиника за хематологија-Скопје.
Ковид-19 е болест која има неколку фази, а секоја фаза има свои специфики и бара различен тип на интервенција. Цели на истражувањата, според вон. проф. д-р Ирина Пановска-Ставридис, се:
- да се утврди зошто кај некои пациенти имуниот систем не успева да се справи со КОВИД-19 инфекцијата во почетните фази;
- дали може да се предвиди текот на болеста и
- дали евентуално би можело да се интервенира за да се превенира тежок облик или несакан исход од истата.
„За таа цел ќе испитуваме два сегмента од имуниот систем. Едниот се таканаречените природни антитела, тоа се вид антитела кои се во состојба да неутрализираат различни вируси и кои имуниот систем ги произведува независно од претходни инфекции или вакцинации, а вториот сегмент се цитотоксичните Т лимфоцити.
Очекуваме резултатите од спроведените анализи да имаат улога во добивање подлабока слика за имунолошкиот одговор на секој од пациентите со КОВИД-19 поединечно, со што би било можно и дизајнирање на индивидуализиран тераписки пристап за секој пациент“, додава проф. д-р Ирина Пановска-Ставридис.
