Децата со атопичен дерматитис (егзема) често имаат потешкотии со спиењето поради интензивното чешање што ја придружува оваа состојба, но резултати од нова студија укажуваат дека хормонот мелатонин може да го подобри квалитетот на нивниот сон. Инаку, атопичен дерматитис се јавува кај 15 до 30 проценти од децата, а повеќе од половина од децата со атопичен дерматитис имаат потешкотии со спиењето.
Треба да се спомене и дека врската помеѓу атопичниот дерматитис и недоволното количество сон има влијание на сите заболени со атопичен дерматитис, без разлика на возраста.
Наведените проблеми со спиењето кај децата тешко се лекуваат, бидејќи антихистаминиците може да престанат да делуваат по неколку дена, а лековите за смирување имаат потенцијално сериозни несакани ефекти.
Интересно е дека претходни истражувања покажале дека пациентите со атопичен дерматитис имаат пониски нивоа на мелатонин во текот на ноќта. Инаку, хормонот мелатонин има и антиинфламаторно дејство, а најчесто се поврзува со спиењето и биолошкиот часовник на организмот. Производството на мелатонин достигнува максимум три до пет часа по почетокот на ноќниот сон.
Мелатонин речиси и не се произведува во текот на денот. Нарушувањето на спиењето може да влијае на производството на мелатонин, како и изложеноста на дневна светлина.
Извор: JAMA Pediatrics
