„Сум слушнала дека постојат (но додека не видам не верувам) деца кои јадат буквално се што ќе им се стави во чинијата. За жал, тоа не е случај со моите деца, а ако не е ни со вашите, не очајувајте. Пребирливоста, иако е многу заморна за родителите, за децата е сосема нормална.
„Децата од градинка природно минуваат низ фази кога се пребирливи и одбиваат да пробуваат нова храна. Особено зеленчук. Ова е сосема нормална развојна фаза, но може да доведе до проблеми ако децата стануваат сè попребирливи“, објаснува д-р Клер Фароу од Истражувачкиот центар за детско здравје на Астон.
Иако сега ви изгледа утешно што не сте единствените на светот што го имаат овој проблем, тоа олеснување трае кратко, само до следниот пат кога ќе послужите брокула. Но, науката конечно најде начин да ви помогне. Новите истражувања покажуваат дека со следење на овие три чекори, родителите можат да го променат односот на детето кон храната.
Нашите истражувања покажаа дека постојаното изложување на детето на одредена храна, наградувањето на секој обид да проба храна и личниот пример што родителот го поставува со јадење храна што детето ја одбива, може значително да го промени односот на детето спрема храната, вели д-р Клер Фароу
Пред да кажеме кои се тие чекори, мора да напоменеме – најважна е упорноста. Мора да бидете упорни. И секогаш да имате на ум дека децата се одлични преговарачи. А за да го достигнете нивното ниво на преговарачка моќ, еве што треба да направите.
ЧЕКОР 1 – ПОВТОРУВАЊЕ: Нудете ја храната што детето ја одбива. Нудете го истиот зеленчук најмалку 14 дена по ред. И бидете трпеливи. Идејата е детето да ја „запознае“ храната, да престане да му биде нова. Некои деца можеби ќе треба да пробаат одредена храна 10-20 пати пред да ја прифатат.
ЧЕКОР 2 – ДАЈТЕ ПРИМЕР: И самите јадете го зеленчукот што му го нудите на вашето дете за ручек и покажете колку ви се допаѓа.
ЧЕКОР 3 – НАГРАДИ: Наградете ги за нивниот труд, дури и ако изеле само едно залче. Или само лижнале. Сè е битно. Големите работи започнуваат со мали чекори.
Сето ова со истиот зеленчук повторувајте го најмалку 14 дена!
„Нашите истражувања покажаа дека постојаното изложување на детето на одредена храна, наградувањето на секој обид да проба храна и личниот пример што родителот го поставува со јадење храна што детето ја одбива, може значително да го промени односот на детето спрема храната“, вели д-р Клер Фароу.
Освен тоа, навиките во исхраната кои децата ќе ги усвојат во детството ќе ги следат и кога ќе пораснат, а вие секако сакате да изградат здрав однос спрема храната.
