„Голема е веројатноста дека имунитетот на SARS-CoV-2 предизвикан од вакцина ќе ослабне со текот на времето, дури и за потенцијално тешката форма на болест (но веројатно во помала мера)“, се заклучоците од документот на SAGE – Scientific Advisory Group for Emergencies (Научна советодавна група за итни случаи).
„Затоа, веројатно е дека кампањите за вакцинација против SARS-Cov-2 ќе се одржат и во текот на идните години, но сега не знаеме која зачестеност на довакцинација ќе биде оптимална за заштита на ранливите од Ковид“, велат научниците.
Документот, насловен „Колку долго вакцините ќе штитат од Ковид“ го составија истакнати вирусолози и епидемиолози од неколку институции: Империјал колеџ во Лондон, Универзитетот Бирмингем и Заводот за јавно здравје на Англија.
Засега не знаеме која зачестеност на довакцинација ќе биде оптимална за заштита на ранливите од Ковид, велат научниците
Британија одобри и користи вакцини од три производители: Оксфорд-АстраЗенека, Фајзер и Модерна.
Податоците покажуваат дека вакцините штитат 95 проценти или повеќе од алфа варијантата што доминираше во Британија во почетокот на 2021 година, велат научниците, но способноста на вакцините да заштитат од инфекција и пренесување на други лица е помала.
Во одделен извештај до британската влада од 22 јули, научниците велат дека постои „реална можност“ да се појават нови соеви кои би можеле да предизвикаат тешки болести или да го ослабнат ефектот на вакцините кои досега се достапни.
Појавата на овие нови соеви на вирус може да доведе до посилни контрола и затворања со негативни последици за економијата, пренесува „Хина“.
