Ако некогаш сте се пошегувале дека во вашето семејство сите раѓаат машки деца, или пак некој ве прашал дали се обидувате да добиете девојче, не сте единствени. Многу родители забележуваат дека нивните деца често се од ист пол и се прашуваат – дали тоа е само случајност или има нешто повеќе?
Биолошкиот пол на детето при раѓање можеби не е 50-50, според резултатите од новата студија од Харвардската школа за јавно здравје Т.Х.Чан. Научниците анализирале податоци од над 146.000 бремености и откриле дека полот на бебето, сепак, не е секогаш чиста случајност – на него може да влијаат одредени биолошки фактори, како возраста на мајката, одредени гени или полот на постарите браќа и сестри, пренесува Гардијан.
Важно е да се напомене дека истражувањето се однесува само на биолошкиот пол на детето при раѓањето.
Студијата, објавена на 18 јули во списанието Science Advances, открива неколку интересни обрасци. Семејствата што веќе имаат три деца од ист пол имаат поголеми шанси и четвртото дете да им биде од истиот пол. На пример, ако првите три деца се девојчиња, шансата четвртото да биде, исто така, девојче е околу 58 %, а по три момчиња шансата за четврто момче е 61 %.
Студијата покажала дека возраста на мајката игра клучна улога во полот на децата при раѓање. Жените кои почнале да раѓаат деца по 28 години имале малку поголема веројатност да имаат или само момчиња или само девојчиња. Истражувачите велат дека овие разлики би можеле да се должат на биолошките промени кај жените како што стареат. Студијата, исто така, открила два гена поврзани со раѓање само момчиња или само девојчиња. „Не знаеме зошто овие гени би биле поврзани со полот при раѓање, но се поврзани, а тоа отвора нови прашања“, рече Хорхе Чаваро, професор по исхрана и епидемиологија и главен автор на студијата.
Тој препорача идните студии да проверат дали начинот на живот, исхраната и изложеноста на хемикалии од животната средина играат улога во полот при раѓање.
Во просек, соодносот на половите во светот е речиси изедначен, со мала предност во корист на машките. Но во рамки на одделни семејства, ситуацијата може да биде сосема поинаква. Научниците го споредуваат ова со фрлање „малку наместена“ паричка – во некои семејства едноставно едната страна на паричката почесто „се паѓа“.
Семејствата што веќе имаат три деца од ист пол имаат поголеми шанси и четвртото дете да им биде од истиот пол. На пример, ако првите три деца се девојчиња, шансата четвртото да биде, исто така, девојче е околу 58 %, а по три момчиња шансата за четврто момче е 61 %
„Ако сте имале две или три девојчиња и се обидувате да зачнете момче, треба да знаете дека вашите шанси не се 50-50. Поголема е веројатноста да имате уште едно девојче“, изјави проф. Чаваро за „Вашингтон пост“.
Истражувањето, исто така, јасно покажало кои фактори не влијаат врз полот на детето. Не се пронајдени значајни поврзаности помеѓу полот и:
- расата,
- етничката припадност,
- крвната група,
- висината, тежината или природната боја на косата на мајката.
Студијата покажала дека возраста на мајката игра клучна улога во полот на децата при раѓање. Жените кои почнале да раѓаат деца по 28 години имале малку поголема веројатност да имаат или само момчиња или само девојчиња. Истражувачите велат дека овие разлики би можеле да се должат на биолошките промени кај жените како што стареат
Исто така, животните навики, исхраната, како и популарните теории за темпирање на „времето на односите“ не биле предмет на оваа студија – па нивната ефикасност останува непозната.
Бидејќи биле анализирани само податоци за мајките, не е познато колкаво е влијанието на генетскиот материјал на таткото.
Родителите кои имаат три или повеќе деца од ист пол често се соочуваат со коментари и прашања како: „Ќе се обидете ли со девојче?“ или „Зарем не би ви дошло добро едно момченце?“ Ова истражување носи олеснување, бидејќи покажува дека ваквите обрасци не се резултат на личен избор, туку на биолошки фактори. Наместо да чувствуваат дека нешто „не прават како што треба“, родителите сега знаат дека природата понекогаш едноставно има тенденција да го повторува истиот модел.
На крајот на краиштата, без оглед дали имате „банда момчиња“, „дружина девојчиња“ или мешано друштво – нема идеален сооднос. Секое дете е свет за себе, со своја енергија, карактер, предизвици и радости. Некои носат бурна бура на авантури, други мирно сонце на тивка добрина. Некои се гласни, некои нежни, некои веќе мали филозофи, а други вистински комичари.
Семејството не се мери според бројот на машки или женски гласови, туку според љубовта што се разменува меѓу ѕидовите на домот. Бидејќи токму во таа разноликост – на пол, темперамент, интереси и соништа – се крие вистинската убавина на родителството.
