Често на улица или во парк имаме можност да видиме малечки од една година како јадат колачи, крофни, бисквити, колачи… Децата уште од мали нозе развиваат навики во исхраната кои веќе во детството, а особено подоцна, може да предизвикаат прекумерна телесна тежина и здравствени проблеми. Доколку се прашувате кога треба да му понудите одредени слатки на вашето дете, еве неколку совети…
ЗА ПОЧЕТОК ЗДРАВИ ДЕСЕРТИ
Десертот е јадење кое се служи после оброк и по правило е со сладок вкус: колач, бисквити, сладолед, торта… Не се препорачува редовно да се нудат вакви слатки на децата пред тригодишна возраст. Меѓутоа, постојат и некои други десерти кои се здрави и потполно погодни за детска возраст, а во исто време се и вкусни. Тоа е различно свежо овошје, овошни каши, овошни салати, пудинг од ориз, десерти од бобинки, овошни јогурти, сушено овошје и слично.
Ваквите десерти се одлична алтернатива за разни колачи и слатки бисквити. Овошните десерти се исто така одличен извор на витамини и минерали и органски киселини. Така, на пример, чизкејкот може да ја надополни потребата на детето за калциум, а патем да ја задоволи потребата за слатко.
Секако, не е забрането на детето да му понудите колач со јаболка или некое друго овошје, особено ако колачот е домашен, па добро знаете дека не сте претерале со количината на шеќер во него. Но, со другите десерти каде што често се кријат шеќери, треба да бидете многу повнимателни. Ви донесуваме поделба на која возраст на детето е дозволено да му се понудат одредени десерти.
ОД 0 ДО 1 ГОДИНА
За толку мали деца, најдобар оброк, а воедно и десерт, се уште е мајчиното млеко, но по шест месеци започнува експериментирањето со дохраната во која улогата на десерт ќе ја преземат свежо цеден овошен сок и овошна каша без додаден шеќер, вештачки бои и конзерванси. Држете се до добро познатото овошје, а за егзотичното овошје ќе има време кога детето ќе порасне. Целта е да се избегнат непријатните алергии, па затоа најмногу се препорачуваат јаболка, круши, банани и сливи.
Јаболката се богати со влакна и лесно се варат, а на најмалите ќе им се допадне вкусот. Сокот од слива е погоден за доенчиња кои страдаат од запек, исто како свежиот плод или кашичка. Бидете внимателни со грозјето, бидејќи може да предизвика формирање гасови во цревата, болки во стомакот и да го вознемири детето.
Кајсиите во свежа форма се советуваат да се даваат дури по 10. месец (готовите кашички од кајсии уште порано, од 6-ти месец), исто како и праските кои се богати со калиум и не содржат многу шеќер.
Покрај овошните десерти, за деца од над 8 месеци се произведуваат крекери од ориз, без вештачки засладувачи, глутен и бои, кои лесно се грицкаат, па детето ќе ужива во дегустација и на ваков десерт.
ОД 1 ДО 2 ГОДИНИ
По прославата на првиот роденден, во детското мени полека се воведуваат и други видови овошје. Доколку детето не покажува знаци на алергија, понудете му цитрусно овошје богато со витамин Ц: портокали, мандарини, грејпфрут. Понудете му на детето киви за да се навикне на вкусот и доколку добро го прифати, бидете сигурни дека дополнително ќе се зајакне имунолошкиот систем на детето.
На оваа возраст, можете да понудите и пенаст десерт направен од свежо кравјо сирење и овошје, на децата кои не страдаат од алергија на кравјо млеко (и кои добро го поднесуваат). Измешајте го сирењето со банана или некое друго овошје или додадете малку домашен џем во сирењето. Можете да купите и бисквити чиј состав е погоден и за најмладите бидејќи многу лесно се топат во устата.
ОД 2 ДО 3 ГОДИНИ
Ако детето е послабо, а мајката сака да пече колачи, нека го искористи ова хоби за да подготви здрав десерт од сирење или домашни бисквити, но кој не содржи многу шеќер и не содржи маргарин, какао и чоколадо, бидејќи овие намирници сè уште не треба да се најдат на менито. Кравјото сирење е добро бидејќи не ги губи своите корисни својства при термичка обработка. Подобро е да им дадете на децата со прекумерна тежина печено јаболко наместо колач со јаболка, мус десерт од сирење и овошје, наместо колачиња со сирење.
ОД 3 ДО 5 ГОДИНИ
Многу родители мислат дека по тригодишна возраст е можно на детето да му ги понудат истите десерти што ги земаат возрасните. Тоа не е точно. Чоколадните торти и слатките бонбони сè уште не се погодни за деца од предучилишна возраст. Чоколадото може да предизвика алергија и да ја зголеми возбуденоста на нервниот систем. Избегнувајте колачи со масни креми, карамели, бонбони, индустриски произведени бисквити кои не се наменети за деца и навикнете го детето на поздрав облик на десерт како природен мармалад (во помали количини), сушено овошје и колачиња со малку маснотии.
Ова се само неколку примери на здрави десерти, изборот, се разбира, е уште поголем колку е детето постаро и колку повеќе имагинација и желба имаат родителите да научат за здравата исхрана. Во секој случај, овошјето е основа за сите здрави десерти, па можете сами да си направите сладолед со минимално додаден шеќер бидејќи овошјето веќе содржи природен шеќер.
