Органзизирањето на роденденот на детето за некои родители е големо уживање, додека некои бегаат од големи подготовки и забава со многу деца. Во летниот период организирањето роденденски забави е уште потешко бидејќи многу луѓе летуваат подалеку од дома и тешко е да се соберат семејството и пријателите на детето на едно место. Доколку вашата семејна динамика е помирна, се стремите кон едноставност и уживање во секојдневните моменти, роденденот на вашето дете можете да го одбележите на неколку интересни начини кои не вклучуваат забава.
Искуствата се поважни од подароците
Преголемите очекувања од прославата на роденденот на детето може да предизвикаат непотребен стрес и да ве принудат да се впуштите во нешто за што немате доволно капацитет или пари.
Понекогаш попладневно дружење со сладолед или торта со бабите и дедовците и најблиското семејство е сосема доволно за прослава. Ги познавате луѓето кои ви доаѓаат, знаете што да очекувате и лесно можете да се договорите со нив за подарок што детето навистина ќе го искористи.
Да му се подари единствено и уникатно искуство на детето е еден од најубавите подароци, но и можност за славење, без помпа. Однесете го детето во музеј, воден парк, театар или на некој излет. Можете да одите и на семејно патување, а искуството да го прилагодите на возраста на детето. Ваквиот роденден сигурно долго ќе го памети, а и вие ќе можете да го прославите како што доликува со вашето дете, без часови потрошени за подготовка на забава.
Интересни роденденски традиции
Родендените се идеални за започнување на некои нови семејни традиции на кои децата можат да се радуваат од година во година. Тоа може да биде посебен семеен ручек или вечера, нешто што ќе го направите за вашето дете само тогаш или нешто што детето ќе го направи за другите.
Една од варијантите е роденденот на детето да го претворите во “ДА ден“ во кој ќе му ги исполните желбите. Важно е уште на почетокот да ги поставите правилата за оваа игра, на што можете да се согласите, а на што не, за да тоа не се сведе на купување играчки или слично.
Неколку недели или денови пред роденденот, можете да креирате сценарио со вашето дете за неговиот совршен ден и да се обидете да го остварите, според вашите можности.
