На почетокот на воведувањето нови намирници во дохраната на детето, се препорачува да се користи свежо подготвен оброк и да се користи свежо, домашно, сезонско овошје, додека домашниот сезонски зеленчук може да се замрзне. Но, мајките често го поставуваат прашањето дали можат да ја чуваат подготвената храна за бебето во фрижидер, за подоцна или за следниот ден.
Нутриционист, д-р Михела Дујмовиќ објаснува дека обично се започнува со воведување на житарки без глутен (ориз, пченка, елда, просо…) кои можете да ги подготвите така што ќе ги зовриете во вода и ќе ги иситните во „мазна“ каша.
„Во вака приготвениот оброк измешајте го мајчиното млеко или млечната формула што вообичаено го користи бебето и понудете му го на бебето или можете да го чувате во фрижидер еден ден, но без додавање млеко. Остатоците од кашата што бебето ја јадело, немојте да ги чувате за подоцна или за следниот ден, бидејќи постои ризик од контаминација на оброкот со микроорганизми присутни во плунката на детето“, вели нутриционистот.
Овошјето не го гответе, а зеленчукот можете да го замрзнете
Секогаш избирајте свежо, домашно, сезонско овошје за да подготвите овошна каша. Не се препорачува да се готви овошјето, бидејќи тоа ја уништува неговата содржина на витамини.
„Затоа, не грижете се ако е зима и нема праски за купување на пазар, бидејќи не им е сезона. Вашето бебе ќе ја проба оваа намирница во лето кога избраното овошје е во сезона и кога тоа со својот нутритивен состав ќе биде најдобро и највкусно. Исто така, не подготвувајте однапред овошни каши, бидејќи витаминскиот состав на сечканото овошје се менува многу побрзо со стоење во воздух“, советува таа.
За сезонскиот зеленчук, особено оние кои сте успеале да ги набавите од домашно производство, нутриционистот советува да го замрзнете за да го зачувате во месеците кога веќе нема да можете да го набавите и да го подготвите со кратка термичка обработка (готвење во вода, пареа или фолија). Пред да му го послужите на детето, во зеленчуковата каша додадете две или три капки маслиново масло, што ќе ја подобри растворливоста на минералите.
