Во периодот на доење, родителите многу често се среќаваат со многу проблеми кога е во прашање здравјето на детето. Многу гастроинтестинални проблеми се поврзуваат со исхраната на бебето, најчесто поради незрелост на цревата. Повеќето од нив, секако не изискуваат медицинска интервенција, но сепак треба да се среди состојбата на детето.
Покрај коликите (грчеви) и регургитацијата (бљуцкање), може да дојде и до различни проблеми со празнење и со столицата кај детето. Ќе ги издвоиме опстипацијата, дијареата и зелената столица како три најчести појави кај бебињата.
ОПСТИПАЦИЈА (КОНСТИПАЦИЈА) ИЛИ ЗАПЕК КАЈ БЕБЕТО
Опстипацијата претставува елиминирање на мали количини сува столица, со потешкотии при дефекацијата и намалена фреквенција на празнење на цревата. Ако детето има опстипација, столицата спонтано ќе се јавува по најмалку три до четири дена, или пак секој ден помала количина на тврда столица.
При тоа, доенчето се напрега или стенка, а плачот може да биде речиси сигурен знак на констипација. Бебе кое има запек ги витка нозете кон стомакот и прави гримаси. Многу често може да има грчеви, болка, надуеност во пределот на стомакот, а апетитот обично е намален.
Доколку пак на 2-3 дена се јавува мека столица која без проблем излегува, тогаш тоа е само нередовна столица.
Опстипацијата кај децата често може да биде последица на дехидратација, затоа е важно да се внесува доволна количина на течност во бебешкиот организам. Покрај ова, друга причина за опстипацијата може да биде забавено празнење на цревата. До тоа доаѓа оти поголемиот процент од водата од содржината на дебелото црево оди во крвотокот. Причини за тоа може да биде и преминување од мајчино млеко или формула на кравјо млеко, а понекогаш тоа може да биде и преголема количина на формула.
◊◊◊◊ Во следното продолжение: Што претставува дијареата
