Најдобри видови физичка активност за зајакнување на мозокот кај децата

Движењето на телото и здравиот мозок се длабоко поврзани, особено кај децата чијшто мозок сè уште ги развива своите способности.

Не станува збор само за физичката кондиција – овие вежби се силен поттик за подобрување на меморијата и концентрацијата кај децата. Дури и 20–40 минути дневно посветени на овие активности можат да донесат значајни придобивки, пишува The Times of India.

Во продолжение – четири телесни вежби кои можат да помогнат во изострување на меморијата и подобрување на концентрацијата.

1. Аеробни вежби (трчање, прескокнување, возење велосипед)

Физичките активности со висок интензитет го зголемуваат протокот на крв до мозокот – особено во хипокампусот, дел од мозокот клучен за меморијата. Поттикнете го детето секојдневно најмалку 20-30 минути да биде активно, на пример, прескокнување јаже, возење велосипед или игри со трчање. Некои истражувања покажуваат дека аеробните вежби можат да го зголемат волуменот на хипокампусот и да го подобрат просторното помнење кај децата и младите.

2. Јога

Јогата комбинира истегнување, рамнотежа и контролирано дишење – сите овие елементи помагаат во намалување на нивото на стрес и на хормоните што можат да ѝ наштетат на меморијата. Едноставни пози како „Дрво“ (Tree Pose), „Мачка-крава“ (Cat-Cow) и „Дете“ (Child’s Pose), заедно со 5 минути длабоко дишење, можат многу да придонесат. Студиите покажуваат дека децата што практикуваат јога имаат подобро внимание и работна меморија во споредба со врсниците што не вежбаат јога.

3. Игри со топка (фаќање, кошарка, фудбал)

Фрлањето, фаќањето и дриблањето со топка ја подобруваат координацијата рака-око, а активностите во кои детето мора да го вклучи не само телото (движење), туку и умот (паметење на зададено, предвидување на исходи), дополнително ја зајакнуваат работната меморија.

Физичките активности со висок интензитет го зголемуваат протокот на крв до мозокот – особено во хипокампусот, дел од мозокот клучен за меморијата. Поттикнете го детето секојдневно најмалку 20-30 минути да биде активно, на пример, прескокнување јаже, возење велосипед или игри со трчање

На пример, игра во која ја фрлате топката, а при секое фаќање поставувате прашање на кое детето треба да одговори. Истражувањата покажуваат дека децата што играат екипни игри со топка имаат подобри резултати во внимание и меморија во споредба со децата што не се физички активни.

4. Боречки вештини или структурирани движења (карате, теквондо)

Боречките вештини бараат не само физичка подготвеност, туку и дисциплина, фокус и меморирање на секвенци од движења („ката“, форми). Дури и само еднаш неделно, почетниот тренинг во боречки вештини им помага на децата да ја развијат способноста за паметење на движења и нивна правилна изведба. Дополнително, учењето на структурата и правилата во ваквите активности придонесува за подобра саморегулација.