На сите им е јасно дека некои градови во светот се посоодветни за животот на децата од некои други места. Студија спроведена од Кампањата за чисти градови ги анализирала улиците во близина на училиштата, брзината на возење и инфраструктурата за возење велосипед, како некои од важните параметри за животот на децата, и го прогласи францускиот главен град за најдобро место во Европа за деца.
Париз е веќе познат како град на љубовта и град на светлината, а сега е и пријателски настроен кон децата, односно место кое важи за најдобро кога станува збор за растење на деца.
Во кампањата анализирани се 36 различни европски градови врз основа на нивните училишни улици, безбедни брзини на возење и заштитена велосипедска инфраструктура. Париз бил на врвот на ранг-листата со вкупен резултат од 75 проценти благодарение на многуте проекти прилагодени на децата во тој град.
Французите се потрудиле да направат безбедна средина за децата, па така во дури 220 улици кои се наоѓаат во зоните околу училиштата забранет е сообраќај. Покрај тоа, брзината на движење на автомобилите во училишните зони е ограничена на 30 км/ч, а има велосипедски патеки „на секој агол“.
Зошто? Сето тоа е дел од револуцијата на две тркала што го менува начинот на движење на Парижаните. Но, ни тоа не е крајот – Париз ги раззеленува и своите училишни дворови: создадени се под сенка игралишта-оази во дворовите на 131 училиште, а за семејствата сега има бесплатен јавен превоз за деца, субвенционирани воннаставни активности, училишен прибор што се дистрибуира од прво одделение, 100 проценти органски оброци во градинките и цени за ручек од само 13 центи за домаќинствата со ниски приходи.
Освен тоа, училници на отворено се достапни во повеќе од 20 училишта, има Јазична академија во шест училишта, се учат дигитални вештини, како и еколошка свест.
За време на летниот распуст, 20.000 деца имаат можност да се вклучат во активности во повеќе од 400 градски центри за слободно време, а покрај тоа, им се достапни градски музеи, библиотеки и центри за позајмување играчки. Неверојатно, нели?
До Париз, кој имаше 75 проценти од бодовите, на второто место на листата на најдобри градови во Европа за детски живот е Амстердам со 63 проценти, по што следува Антверпен со 62 проценти. Еве како изгледа листата на топ 10:
- Париз
- Амстердам
- Антверпен
- Брисел
- Лион
- Хелсинки
- Барселона
- Бристол
- Осло
- Гент
