Експертите на Светската здравствена организација (СЗО) издадоа препораки во кои се вели дека интервалот помеѓу примање на две дози на вакцината против коронавирус, чии производители се „Фајзер“ и „Бионтек“, може да се продолжи до шест недели.
Стратешката советодавна група на експерти за имунизација на СЗО, позната како САГЕ, официјално ги објави упатствата денеска. Во нив се вели дека се препорачува интервал од 21 до 28 дена помеѓу првата и втората доза. Но СЗО исто така наведува и дека „повеќе земји се соочуваат со исклучителни околности на ограничено снабдување со вакцини, поради што некои размислуваат за одложување на давање на втората доза, како би се зголемил бројот на лица кои ја примиле првата доза од вакцината“.
-
Од СЗО додаваат дека овој „прагматичен пристап“ е базиран на „моментално достапните клинички истражувања“ и дека би можел да се смета како одговор на „исклучителни епидемиолошки околности“
Оттаму велат дека во моментов постои недостаток на докази за тоа дали вакцинацијата го намалува ризикот од трансмисија на вирусот на други луѓе, пренесува АП.
