Карантините за време на пандемијата на Ковид, како затворање на училиштата, откажани спортски активности и наредби за останување дома, влијаеле на тоа да мозоците на тинејџерите прерано остарат и тоа за дури четири години, утврдиле научниците од Универзитетот Вашингтон.
Нова студија, објавена во понеделникот во списанието Proceedings of the National Academy of Sciences, е уште еден доказ дека пореметувањата во секојдневните рутини може да придонесат за развој на проблеми во однесувањето, пораст на нарушувања во исхраната и развој на анксиозност и депресија кај адолесцентните девојчиња. и момчиња, пренесува NBC.
Научниците од универзитетскиот Институт за истражување и наука на мозокот (I-LABS) ја започнале студијата користејќи магнетна резонанца уште во 2018 година за да утврдат како структурата на мозокот на 160 тинејџери од областа Сиетл се развивала со текот на времето. Учесниците во студијата, речиси еднаков број на момчиња и девојчиња, биле на возраст меѓу 9 и 19 години на почетокот на студијата.
Водачот на истражувањето, ко-директор на I-LABS, Патриша Кул, вели дека тие не можеле да ги следат скенирањата на мозокот до 2021 година, откако во 2020 година започна ковид карантинот, поради што го префрлиле фокусот на студијата за да дознаат како изолацијата влијаела врз структурата на мозокот на адолесцентите.
Со мерење на дебелината на церебралниот кортекс – надворешниот слој на мозочното ткиво што ги контролира неговите функции на повисоко ниво, како што се расудувањето и одлучувањето – откриле дека мозокот на тинејџерите прерано остарел – за 1,4 години, додека скенирањето на мозокот на девојчињата покажало забрзано стареење од дури 4,2 години.
Церебралниот кортекс природно се истенчува како што старееме. И хроничниот стрес може да предизвика слични промени во мозокот. Но, во периодот од три години помеѓу првото скенирање и понатамошното следење на состојбите, церебралниот кортекс помеѓу тинејџерките се истенчил многу повеќе отколку што очекувале истражувачите.
„Како што старееме, истенчувањето на кортексот се поврзува со помалку време за брза обработка на информациите, помалку флексибилно размислување и сите други проблеми што ги поврзуваме со стареењето. Општо, кај сите тинејџери кои учествуваат во истражувањето забележавме забрзано стареење“, вели Кул.
Стареењето на мозокот било поизразено кај тинејџерките. Со скенирањето е утврдено дека истенчувањето било раширено по целиот мозок на девојчињата, се случувало во 30 регии во двете хемисфери и во сите лобуси. Во машкиот мозок, истенчувањето било ограничено на само два регии, и двете во окципиталниот лобус, кои влијаат на перцепцијата на растојанието и длабочината, препознавањето на лица и меморијата.
Поголемото влијание врз девојчињата може да се должи на разликите во важноста на социјалната интеракција за девојчињата во споредба со момчињата, смета проф. Кул. Момчињата се собираат поради спорт и физичка активност, а девојчињата адолесценти имаат тенденција да се потпираат на личните односи за емоционална поддршка и развој на сопствениот идентитет.
