Научете го детето да си игра

До шестиот месец, повеќето деца немаат упадливи реакции на други деца, па нивните интеракции се многу скромни. Помалите деца сакаат ккога други, поголеми деца ги забавуваат и се трудат околу нив, но тоа не значи дека се способни да си играат со нив, бидејќи тоа е процес кој се учи. На една година можеби детето ќе посака на својот врсник да му ја даде играчката или да ја земе неговата, не грижејќи се за бурната реакција што ќе ја предизвика, што значи дека треба да се наоружате со трпение додека не почне да се социјализира.

Конфликтите помеѓу децата најчесто избиваат поради играчки и поради различно водење на правилата на игра, а каде има конфликти, тука се и бурни реакции на плачење, викање, па и тепање. Со оглед дека тоа кај малите деца брзо се решава, штом се вклучи возрасно лице во решавање на проблемот, секоја таква прилика треба да се искористи да му се предочи на детето дека е најубаво да се игра во пар. Секако дека така нема преку ноќ да го научите, ниту пак до неговата четврта година ќе го сфати тоа, но тоа не значи да не му повторувате дека со врсниците може да си игра само по правила кои ќе бидат задоволителни за сите.

За да успеете во тоа, користете позитивен поттик, а не принудување.

Никогаш не му ја земајте омилената играчка за да ја дадете на друго дете, никогаш пред други не му зборувајте дека е себично, дека е лош другар.другарка и дека никој нема да сака да си игра со него. Сето ова е контрапродуктивно, за разлика од пофалбите кои треба да му ги упатите на детето секој пат кога своеволно ќе посака да подели нешто со другите.

Додека мало дете не порасне, додека не наполни најмалку четири години, и додека не почне да прифаќа социјални норми кои важат меѓу возрасните, поттикнете го да игра игри кои подразбираат давање. За тоа се идеални играњето фудбал и дофрлување, бидејќи топката не е само за еден играч. Тука спаѓа и градење куќи од коцки, бидејќи четири раце побрзо градат, лекување кукли и сите активности на отворено, од нишање, до спуштање по лизгалки, правење ручек во кал.

Секако дека и овие игри често ги ставаат детските чувства на тест, па ваша интервенција ќе биде неопходна. Можеби другото дете побрзо ќе шутира, или ќе изгради куќа… Но, не грижете се за тоа, со тек на време детето се ќе научи.

Важно е единствено да не толерирате напади на бес, фрлање на играчки, буткање или навредување на другите деца.

Во таков случај, прекинете ја играта, смирете го детето и објаснете му дека не може и не мора во се да биде најдобро, туку дека е најважно да се негува другарството. Не го казнувајте и не го повлекувајте од друштвото, оти така нема да може да научи што е прифатливо однесување, но и за себе ќе формира лоша слика од која подоцна тешко ќе се ослободи.