На малите деца сонот им е неопходен исто колку и храната и водата. Но, речиси секој родител во некој момент се соочува со изјавите како „Прочитај ми уште една приказна за добра ноќ„ или „Не можам да заспијам. Може ли да спијам со тебе?„.
Без телевизија
Два часа пред спиење децата не би требало да гледаат телевизија или да користат компјутер или телефон. Истражувањата докажале дека сината светлина што ја емитираат електронските направи, како телевизорот, мобилниот телефон, прават мозокот да се чувствува буден. Децата на оваа светлина се два пати почувствителни од возрасните. Затоа овие направи треба да се тргнат од децата, два часа пред спиење. Доколку не знаете како да ги анимирате во овој временски период, обидете се со читање приказна или слушање музика.
Температура
Светлото не е единствената работа која предизвикува несоница кај децата. Длабокиот сон, исто така е поврзан со температурата. Мелатонинот, хемикалија која се лачи во организмот и помага за подобро заспивање, ја регулира и температурата на телото. Заради тоа пред да го сместите детето во кревет, погрижете се собата да им биде изладена или загреана доволно за спиењето да им биде попријатно.
Доследност
Како што до сега веројатно сте заклучиле, рутината е голем дел од начинот на кој се воспитуваат децата. Тоа значи дека би требало да ги навикнете секоја вечер да одат во исто време на спиење и секое утро да стануваат во исто време. Исто така, би требало детето да го научите да одржува континуитет и секоја вечер да ги прави истите работи пред спиење, како што се капење, миење заби, читање приказни и слично. Кога малку ќе пораснат, во ред е да ги пуштите децата од време на време да останат некое време подолго за да го догледаат филмот. Но, обидете се да ја одржите рутината и ретко дозволувајте отскокнување од распоредот додека доволно не пораснат сами да водат сметка за себе.
Кревет не е игротека
Уште една работа која може да предизвика несоница кај децата е користење на креветот за други работи освен за спиење. Децата треба да научат дека креветот не е замена за креветот во дневната соба, место за оброци или место за пишување на домашна задача. Доколку децата ги прават овие или слични работи во кревет, нивната слика за поимот „одење во кревет„ потполно ќе се измени, а тоа е токму она што треба да го спречите.
