Студија објавена во списанието Scientific Reports сугерира дека феталните движења му овозможуваат на бебето да изгради основна мрежа на мозокот за да разбере кој дел од телото се движи.
Истражувачите велат дека бебињата всушност се обидуваат да поттикнат важни врски во нивниот растечки мозок со овие движења и удари и дека тоа им помага да создадат внатрешна „мапа“ на сопственото тело. „Овие удари, познати како фетални движења, му овозможуваат на бебето да изгради основна мозочна мрежа за да разбере кој дел од телото се движи и како се допира“, потенцираат тие.
Тимот ги анализирал мозочните бранови на 19 доенчиња стари 2 дена, од кои некои биле предреме родени. Користењето на неинвазивна електроенцефалографија (ЕЕГ) покажало дека ударот на бебето го активира делот од неговиот мозок поврзан со сетилниот влез, познат како соматосензорен кортекс.
„Наодите од студијата може да имаат импликации за неонаталната клиничка нега, како на пример како да се завитка предвремено роденото бебе за да може да го задржи чувството дека е во утробата и да продолжи да ја развива оваа основна мозочна мрежа“, велат авторите на студијата од Универзитетот во Лондон, Кимберли Вајтхед и Лоренцо Фабрици.
Поврзаноста на ударите со мозочната активност престанува неколку недели по раѓањето. Повеќето трудници почнуваат да ги чувствуваат движењата на бебето помеѓу 16-та и 24-та недела од бременоста. Чувствуваат како удари, треперење, скокоткање…, во зависност од тоа колку напредувала бременоста, а чувството е индивидуално за секоја жена.
Не постои правило за тоа колку удари дневно се нормални, но доколку забележите дека бебето е помирно од вообичаено, обрнете внимание. Изедете нешто слатко и легнете на страна. Во рок од еден час треба да почувствувате најмалку 10 движења.
Жените ги чувствуваат феталните движења порано во втората и секоја наредна бременост. Секако, има и посмирени и поактивни бебиња, што не значи дека такви ќе останат и кога ќе се родат. Ритмичките нежни движења се икање на бебето во стомакот, кое го чувствува и мајката.
Помеѓу 24 и 28 недела фетусот реагира на познати звуци и гласови, а ударите се најсилни помеѓу 32 и 36 недела кога расте, зацврснува и зајакнува. После тој период се се смирува бидејќи на бебето почнува да му недостига простор и главно се спремни за породување. Нормално е дека има помалку удари, а активноста на плодот обично се зголемува кога трудницата ќе се смири, како и после оброк.
