Студија на Универзитетот „Сун Јат-сен“ во кинески Гуангжу се обидува да открие како промената на сезоната и температурата може да влијае врз ширење на новиот коронавирус, пишува „South China Morning Post“.
Студијата, која е објавена минатиот месец и која допрва треба да помине рецензија, сугерира дека топлината има сигнификантна улога врз коронавирусот и може значително да влијае на неговото ширење.
Коронавирусот, како што се наведува во студијата, е чувствителен на високи температури, што би можело да влијае на спречување на неговото ширење во земји со потопла клима, додека земјите со постудени климатски услови би требало да воведат построги контроли на вирусот.
Топлината има сигнификантна улога врз коронавирусот и може значително да влијае врз неговото ширење
Во многу земји низ светот, владите и експертите се надеваат дека бројот на заболени ќе се намалува со потоплото време, но друга студија, којашто е објавена од група на истражувачи, меѓу кои и епидемиолог Марк Липсич од универзитетот Харвард, открива дека ширењето на коронавирусот е можно и во области со различно ниво на влага во воздухот.
„Самите временски прилики, како што е зголемувањето на температурата и влажноста на воздухот нема нужно да влијаат врз опаѓање на бројот на заразени од коронавирус без спроведување на јавно-здравствените мерки“, се вели во оваа студија.
Групата на научници од Гуангжу, пак, ја темелат својата студија врз податоците од секој случај на коронавирус, кој е потврден меѓу 20 јануари и 4 февруари, што вклучува повеќе од 400 кинески градови и региони.
Податоците биле споредени со јануарските метеоролошки податоци, а анализата покажала дека бројот на заразени лица се зголемувал се додека температурата на воздухот не достигнала 8,72 степени Целзиусови, а потоа бројот на заразени почнал да опаѓа.
Коронавирусот, како што се наведува во студијата, е чувствителен на високи температури
„Температурата на воздухот има влијание на околината во која живеат луѓето и таа може да има сигнификантна улога во услови на развој и контрола на епидемија“, се вели во студијата.
Хасан Заракает, експерт во Центарот за заразни болести на „American University of Beirut“, тврди дека потоплото и повлажно време би можело да влијае врз коронавирусот правејќи го понестабилен, а со тоа и помалку пренослив, како што било случај со други вирусни патогени.
„Сè уште учиме за овој вирус, но врз основа на она што го знаеме за другите коронавируси може да се надеваме“, тврди Заракает. „Ако временските прилики успеат да ни помогнат во намалување на способноста за трансмисија на вирусот, тогаш можеби ќе можеме да го пресечеме ланецот на негово пренесување“.
Мајк Рајан, извршен директор на Програмата за вонредни ситуации при Светската здравствена организација, и порача на јавноста да не се надева премногу дека коронавирусот ќе исчезне автоматски со доаѓањето на летото.
„Мора да претпоставиме дека вирусот и понатаму ќе има способност да се шири. Лажна надеж е да се каже – да, ќе исчезне како грипот… Не можеме да дадеме таква претпоставка. А и нема докази“, изјавил Рајан.
