Британските научници велат дека хипертоничните капки за нос може да ја скратат настинката кај детето за два дена и да го намалат ризикот да се разболат и останатите членови на семејството.
„Децата имаат од 10 до 12 инфекции на горните дишни патишта годишно, кои ги нарекуваме настинки, што има големо влијание врз нив и нивните семејства. Постојат лекови за ублажување на симптомите, како парацетамол и ибупрофен, но нема третмани кои можат побрзо да ја олеснат настинката од хипертонични капки“, објаснува Стив Канингам, професор на Универзитетот во Единбург.
За потребите на студијата, истражувачите им дале инструкции на родителите како да им капуваат во носот на децата. Децата добивале по три капки во секоја ноздра најмалку четири пати на ден.
„Откривме дека децата кои користеле капки за нос со солена вода имале симптоми на настинка во просек по шест дена, додека оние со конвенционални методи на лекување имале симптоми во текот на осум дена. Децата кои примаа хипертонични капки исто така имале потреба од помалку лекови во текот на траењето на болеста“, додава Канингам.
Само 46% од домаќинствата кои користеле хипертонични капки за нос пријавиле дека останатите членови на семејството се заразиле со настинка од детето. 82% од родителите рекле дека капките за нос му помогнале на нивното дете побрзо да оздрави, а 81% рекле дека ќе ги користат капките во иднина.
Истражувањето наскоро ќе биде претставено на конгресот на Европското респираторно друштво во Виена.
