За успешна заштита на населението од КОВИД-19 можеби ќе биде потребна 80 процентна имунизација, но нивото на дезинформации и недовербата во вакцината може да ги загрозат напорите во борба портив пандемијата, соопштија утрово британските научници.
Извештајот на стручните британски институции покажува дека, делумно поради бројните дезинформации и однесување на поедници, околу 36 проценти од луѓето во Велика Британија не се сигурни или е малку веројатно дека ќе се согласат да се вакцинираат против КОВИД-19.
За јавноста да даде поддршка на вакцинацијата, потребен е “отворен дијалог“, се истакнува во извештајот и се повикува на “искрен разговор“ во кој ќе се одговори на очекувањата на јавноста дека животот ќе се врати во “нормала“ штом пристигне вакцината.
“Вакцината и имунизацијата се две различни работи. За да се постигне 80 процентна вакцинираност потребна за заштита на заедницата, потребна ни е стратегија на силни темели“, вели проф. Мелинда Милс од Оксфорд универзитетот, експерт за демографија и главен автор на извештајот.
Анкетите спроведени пред и за време на пандемијата во многу земји, покажуваат дека довербата во вакцината е кревка и дека политичката поларизација и дезинформациите кои се шират може да влијаат на стапката на прифаќање на вакцинацијата.
“Мора да излечеме поука од минатото и да се тргнеме од едностраното давање на информации и наместо тоа да покренеме отворен дијалог во кој ќе одговориме на неточните информации и во кој нема да ја игнорираме загриженоста на луѓето поради вакцинирањето и нивното колебање“, вели проф. Милс.
Во извештајот исто така се истакнува дека владите сега би морале да планираат “постапна и етична“ имунизација, заснована на јасни принципи за кои “доволно ќе се дискутира со јавноста за да се стекне доверба“.
Се препорачува меѓу првите кои ќе се вакцинираат да бидат здравствените работници, како и други ризични групи како наставници, возачи на автобуси и продавачи, но и членовите на ранливите групи како што се бездомниците и затворениците.
