Одгледувањето ментално силни деца не значи дека тие нема да плачат, да бидат тажни или дека ќе бидат успешни во сè. Ментално силните деца не се имуни на тешкотии, но ниту ги потиснуваат своите чувства. Напротив, сосема е спротивното. Менталната сила им помага на децата да излезат од проблемите и им дава сила да продолжат понатаму, дури и кога се сомневаат во себе.
Силен ментален склоп му овозможува на детето да ги искористи сите свои потенцијали во животот. Сепак, за да одгледате дете со силен ум, потребно е да избегнувате одредени постапки, објаснува Ејми Морин, психотерапевтка и предавач на Универзитетот Нортистерн. Таа објаснува што родителите треба да прават за нивните деца да израснат во ментално силни луѓе, способни да се справат и со најтешките животни предизвици.
- Создавање менталитет на жртва
Поради седење на клупа за време на фудбалски натпревар или лоша оценка по природни науки, од детето не треба да се прави жртва. Одбивањето, неуспехот и неправдата се дел од животот. Одбијте да учествувате во самосожалување и учете ги децата дека, без разлика колку околностите се тешки или неправедни, секогаш можат да преземат некои позитивни чекори.
- Наметнување чувство на вина
Кога му наметнувате чувство на вина на детето, го учите дека вината е неподнослива. Така одгледаните деца нема да знаат да кажат „не“, дури и кога тоа го сакаат. На пример: „Биди другар и дозволи ми да препишувам од тебе“ или „Ако ме сакаш, ќе го направиш ова за мене“. Покажете им дека, иако понекогаш чувствувате вина, нема да дозволите негативните чувства да ве спречат да донесувате мудри одлуки.
- Ставање на детето во центарот на светот
Ако целиот ваш живот се врти околу децата, тие ќе пораснат со уверување дека и другите треба така да се однесуваат кон нив. Со таков став нема да стигнат далеку. Научете ги да се фокусираат на тоа што можат да му понудат на светот, а не само на тоа што можат да добијат од него.
- Избегнување на страв во животот
Иако држењето на детето во „заштитен балон“ би ве поштедило од многу грижи, со тоа го учите дека стравот треба постојано да се избегнува. Покажете им дека најдобриот начин да се победи стравот е соочувањето со него. Така ќе одгледате храбро дете, способно да излезе од својата зона на удобност.
- Дозволување детето да носи големи одлуки
Ако децата одлучуваат што ќе јаде семејството за вечера или каде ќе оди на одмор, добиваат моќ за која не се подготвени. Однесувајќи се кон децата како рамноправни или како шефови, всушност ги лишувате од ментална сила. Дозволете им да носат едноставни одлуки, но задржете јасна семејна хиерархија и научете ги да прифаќаат правила и обврски.
- Очекување совршенство од детето
Очекувањето децата секогаш да бидат совршени е нереално. Научете ги дека е во ред да не успеат и дека е нормално да не бидат одлични во сè. Децата кои се трудат да станат подобра верзија од себе, а не најдобри во сè, нема постојано да се споредуваат со мислењето на другите.
- Дозволување избегнување на одговорност
Дозволувањето децата да ги избегнуваат обврските или одењето во градинка и училиште може да изгледа примамливо. Секако, сите сакаме децата да имаат безгрижно детство. Но тоа се постигнува со обврски соодветни на возраста, преку кои тие ќе ја развијат менталната сила и одговорноста.
- Заштитување на децата од болка
Повредените чувства, тагата и вознемиреноста се дел од животот. Дозволувањето детето да искуси негативни емоции му дава можност да ја вежба својата „зона на нелагодност“. Пружете им насока и поддршка за да стекнат доверба во сопствената способност да се справат со неизбежните животни тешкотии.
- Чувствување одговорност за емоциите на децата
Ако постојано се обидувате да го развеселите детето кога е тажно или да го смирите кога е вознемирено, вие ја преземате одговорноста за регулирање на неговите емоции. Децата мора да научат сами да се справуваат со своите чувства. Проактивно учете ги на здрави начини за справување со емоциите, за да не зависат од другите да го прават тоа наместо нив.
