Алергијата на храна не е ретка појава кај децата, а некои намирници кои предизвикуваат алергиски реакции се користат речиси во секој оброк. Алергиите обично се јавуваат кога имуниот систем ќе препознае одредена намирница како опасност и ќе почне да се бори како против инфекција.
Важно е да се внимава на секој, дури и најмал, симптом на алергиска реакција кај децата, бидејќи и да се јави блага реакција, постои опасност следната да биде посилна.
Доколку детето има алергија на храна, најдобро е таа намирница целосно да се избегнува, но треба да се напомене и дека некои благи алергии можат да исчезнат кога децата ќе пораснат.
Инаку, доколку еден од родителите има сезонски алергии, астма или егзема, поголеми се шансите детето да има алергиска реакција. А ако едно од децата има алергија на некоја храна, се зголемуваат шансите и неговите браќа и сестри да имаат алергија. Добрата вест е, сепак, дека повеќето од најчестите алергиски реакции (на кравјо млеко, соја, јајца и јаткасти плодови) сами престануваат до третата година од животот на детето.
Постојат и интолеранции на одредени видови храна, кои се разликуваат од алергиите. Разликата е во тоа што кај алергиите реакцијата ја предизвикува имуниот систем, додека кај интолеранцијата се работи за дигестивниот симптом и иако е непријатна, интолеранцијата генерално не е опасна по живот.
Симптоми на алергија на храна кај децата
Кога детето е доволно големо да зборува и знае како да ви каже што чувствува, може да ви пријави дека чувствува чувство на печење на јазикот, чешање или трнење во устата, дека чувствува како нешто да му е заглавено во грлото, дека ушите му се затнати. Малите деца, кои не можат да го вербализираат сето ова, може да ги влечат ушите или јазикот, да плачат поинаку и многу да се лигават.
Вообичаени симптоми на алергија на храна и кај децата и кај возрасните се манифестираат на неколку органи и делови од телото:
- На кожата – чешање, осип, оток, црвенило
- На очите – солезење на очите, црвенило, чешање, оток
- На носот – исцедок од носот, чешање, затнат нос
- Во устата – чешање, отекување на усните, јазикот и устата, што може да влијае на голтањето и дишењето
- Во стомакот – мачнина, повраќање, дијареа, болки во стомакот
- На органите за дишење – чувство на стегање во градите (потешкотии во говорот и дишењето), отежнато дишење, кашлица
- На кардиоваскуларните органи – слаб пулс, губење на свеста, бледило на лицето, вртоглавица, брзо зголемување или намалување на пулсот.
Кога неколку органи реагираат на одредена храна, тоа се смета за анафилактична реакција и оваа состојба бара итна медицинска помош.
Тестови кои откриваат алергии
Доколку се сомневате на алергија, прво се прават кожни тестови – на вештачки лезии на кожата се ставаат мали количества алерген, а доколку се појави црвенило, тоа се смета за алергија. Постојат и тестови на крвта кои откриваат алергии.
Што да направите ако постои алергија
Клучно е да се избегнува храна која предизвикува алергиска реакција. Проверете што јаде вашето дете, читајте го составот на производите, а во рестораните секогаш прашувајте за алергените во храната што ја јаде вашето малечко.
Многу е важно блиските пријатели и училиштето да бидат информирани за алергијата што ја има детето, за да бидат поддршка за детето, но и во ситуации кога детето оди на екскурзии, рекреативна настава, каде што не е под ваше будно око.
