Познато е дека за време на бременоста се појавуваат разни појави кои вообичаено ни се туѓи. Всушност, и самата бременост е фасцинантен и тешко замислив процес, кога малку подобро ќе размислиме за тоа. Но, додека некои „попратни појави“ ги прифаќаме полесно, други потешко. Сепак, со текот на времето се навикнуваме на нив и некако ги „издржуваме“, најмногу затоа што знаеме дека – нема да траат вечно.
Во продолжение, неколку непријатни, но сосема вообичаени појави во бременоста:
- Гасови
Бурните хормонални промени го забавуваат варењето, што често резултира со надуеност и гасови. Овој проблем не може целосно да се елиминира, но може да се држи под контрола со правилна исхрана и редовна физичка активност.
- Често мокрење
Неможноста за целосна контрола на мокрењето е еден од понепријатните проблеми во бременоста. Нагло кашлање, кивање или гласно смеење може да доведе до непријатна ситуација, особено на јавно место. Се препорачува користење дневни влошки за да се намали ризикот од дамки.
- Неподносливост на мириси
Чулото за мирис значително се изострува за време на бременоста, па трудниците ги чувствуваат мирисите многу поинтензивно од другите. Некои жени дури почнуваат да не го поднесуваат сопствениот мирис, што е резултат на зголемено лачење слуз во телото. Други, пак, развиваат силна одбивност кон одредени намирници.
- Засилен раст на влакна
Поради хормоналните промени, кај многу жени во бременоста се појавуваат влакна на несакани места – на лицето, градите, стомакот или грбот. Наједноставен начин за нивно отстранување е пинцета, иако ефектот е привремен.
- Митесери, акни и други кожни проблеми
Поради зголеменото ниво на хормони, околу третиот месец од бременоста може да се појават митесери, акни и други промени на кожата. Соодветната нега на лицето и благите козметички производи можат значително да помогнат.
- Хемороиди
Голем број трудници добиваат хемороиди за време на бременоста, најчесто како последица на запек. Правилната исхрана богата со растителни влакна и доволна хидратација можат да помогнат во намалување на овој проблем.
