Кога на 22-годишна возраст Дорис Грунвалд сосема случајно дознала дека нејзините родители не можат да бидат нејзини биолошки родители, започнала да истражува што се случило. Наскоро открила дека најверојатно се работи за замена на бебиња во родилиште. Сепак, потрагата по другото семејство со години била неуспешна – сè до сега, 35 години подоцна.
Имено, младата мајка Џесика по породувањето забележала недоследности во евиденцијата меѓу неа и нејзиното дете, по што и таа започнала истрага за можната замена.
Двете жени, чии приказни ги објави „Kronen Zeitung“, денес имаат 35 години. Тие биле заменети како бебиња во родилиштето на Универзитетската болница во Грац, во октомври 1990 година. Случајот е конечно разрешен оваа година, потврден преку ДНК анализа.
Австриската телевизија ORF во понеделникот ја објави приказната за двете жени кои неодамна се запознале – и двете родени во октомври 1990 во Грац. Денес, и Дорис и Џесика ги запознале своите биолошки родители, а целата ситуација ги погодила и шокирала сите вклучени.
И Дорис и Џесика биле предвреме родени и веднаш по раѓањето биле сместени во инкубатори, наместо во собите со мајките. Болницата за агенцијата dpa ја потврдила информацијата за замена на бебињата.
„Длабоко жалиме за оваа грешка што се случила тогаш“, изјавила директорката на болницата.
Дорис, уште пред неколку години, дознала дека не може да биде биолошко дете на родителите што ја одгледале, бидејќи при дарување крв било утврдено дека има несоодветна крвна група во однос на нивната. И покрај болнички истраги и јавен апел упатен во 2016 година, другото семејство долго време не било пронајдено.
Џесика, пак, ја открила вистината пред само неколку недели – за време на бременоста ја дознала својата крвна група и се сетила на нерешениот случај со замена на бебиња во болницата во Грац. Контактирала со Doris, и се воспоставила врската меѓу нив.
„Се чувствувам како да имам сестра веќе 35 години“, изјавила Jessica, опишувајќи го искуството како малку морничаво, но сепак убаво.
Doris, која за замената дознала многу порано, нивната средба ја опиша како „неописливо добар момент“.
