Децата понекогаш знаат да дадат некои непромислени изјави, но има и ситуации кога кажуваат нешто доста сериозно, но родителите не обрнуваат многу внимание и едноставно тоа не го сфаќаат сериозно.
Меѓутоа, некои зборови и фрази на децата никогаш не треба да ги земаме здраво за готово, туку да се позанимаваме со нив бидејќи тоа е важно за емоционалното и менталното здравје на децата.
- Никој не ме сака
Кога детето изразува чувство на отфрлање или осаменост, тоа може да укажува на проблеми со односите со врсниците или ниско самопочитување. Важно е да се истражат причините за таквите чувства и да му се пружи поддршка на детето за да изгради позитивна слика за себе.
- Не сакам да одам на училиште
Одбивањето на детето да оди на училиште може да укаже на различни проблеми, како што се потешкотии во учењето, конфликти со врсниците или дури и малтретирање. Наместо веднаш да претпоставите дека се работи за мрзеливост, најдобро е да разговарате со детето и да се обидете да ја откриете вистинската причина.
- Те мразам
Кога детето ќе им каже на родителите „те мразам“, тоа може да биде многу болно за родителите, но имајте на ум дека тоа најверојатно го кажува во момент на фрустрација или лутина. Наместо да реагирате дефанзивно, подобро е да останете смирени и да му помогнете на детето да ги изрази своите чувства на конструктивен начин.
- Сакам да бидам сам/а
Потребата за повлекување може да биде нормална во одредени фази од развојот, но ако детето постојано избегнува дружење или активности кои претходно му носеле радост, тоа може да укажува на посериозни проблеми. Важно е да се следи ваквото однесување и доколку продолжи, да се побара стручна помош.
- Никогаш не ме слушаш
Ако детето се чувствува како родителот да не го слуша, тоа може да доведе до фрустрација и чувство на запоставување. Активното слушање и потврдување на чувствата на детето помага да се изгради доверба и отворена комуникација. Според советничката за ментално здравје и терапевт, д-р Кајла Спина Хоран, потврдувањето на чувствата на детето е клучно за подобрување на интеракциите родител-дете и за намалување на конфликтот.
Препознавањето на овие изјави и разбирањето на нивното можно значење им помага на родителите подобро да ги поддржат своите деца во соочувањето со предизвиците. Отворениот и емпатичен разговор е клучен за градење доверба и сигурност во семејната средина.
