Според резултатите од ново истражување, нискиот број на лимфоцити (лимфоцитопенија) пред изложување на новиот коронавирус SARS-CoV-2 може да биде поврзан со зголемен ризик од смртен исход од КОВИД-19.
Со оглед дека апсолутниот број на лимфоцити (ALC) е речиси универзално достапен и лесно може да се протолкува, овој биомаркер за ризик од смртен исход може да биде многу корисен, истакнуваат стручњаците.
Лимфоцитопенијата е вообичаена кај пациентите со КОВИД-19, а континуираното намалување на апсолутниот број на лимфоцити (ALC) се смета за ризик фактор за респираторно затајување и смрт.
Треба да се спомене дека лимфоцитите чинат 15 до 40 проценти од сите бели крвни клетки. Лимфоцитите се центар на имуниот систем: тие го заштитуваат телото од вирусни инфекции, им помагаат на другите клетки во заштита на телото од бактериски и габични инфекции, се развиваат во клетки кои произведуваат антитела (плазма клетки), се борат против ракот и помагаат во усогласување на активностите на останатите клетки во имуниот систем.
Бројот на лимфоцити може да се намали брзо по тежок и голем стрес и за време на лекување кое вклучува кортикостероиди, хемотерапија и зрачна терапија.
