Да се гледа бебе што спие е еден од најсмирувачките и најубавите погледи за новите родители. Кога вашето малечко одмора, можете да ги набљудувате тие минијатурни прстенца, да уживате во заспаните очиња и во нивното симпатично носенце. Ги сакате и сите оние звуци што ги испуштаат, „пуфкањата“, како и нивното мало слатко отворено устенце.
Но, внимавајте! Дишењето преку уста додека спијат може да биде знак за одредени проблеми со горниот респираторен тракт, кој ако не се третира, може да доведе до здравствени компликации. Во продолжение, повеќе информации за тоа зошто вашето бебе би можело да спие со отворена уста, што можете да направите за да му помогнете и кога треба да се обратите на педијатар.
Зошто бебето спие со отворена уста
Новороденчињата речиси исклучиво дишат преку носот, освен ако нивните носни патишта не се блокирани на некој начин. Всушност, до околу три-четиримесечна возраст, бебињата сè уште немаат развиено рефлекс да дишат преку устата (освен кога плачат).
Дишењето преку уста може да биде и знак за слип апнеја, што во основа значи блокирање на горните дишни патишта. Кај бебињата и децата, најчесто е предизвикана од зголемени тонзили или аденоиди. Други симптоми се ‘рчење, немирен сон, паузи во дишењето и кашлање или гушење
Истражувањата покажуваат дека дишењето преку уста може да се развие како одговор на блокада во горниот респираторен тракт, во носот или грлото. Ова може да биде нешто безопасно, како запушен нос поради настинка или алергии, но исто така може да биде и знак за покомплексни состојби.
Работата е во тоа што дишењето преку уста не е толку ефикасно колку што е дишењето преку нос – особено кога станува збор за апсорпција на кислород во белите дробови. А дишењето преку нос помага и во филтрирање на бактериите и други иритации од навлегување во телото.
Потенцијални причини за дишење преку уста:
- Слуз: Ако носот е запушен со слуз, бебето може да биде принудено да дише преку устата. Тоа може да се случи по настинка или поради алергии. Како и да е, бебињата не можат лесно самите да ја исфрлат слузта, па затоа може да компензираат преку дишење на уста.
- Апнеја при спиење: Дишењето преку уста може да биде и знак за слип апнеја, што во основа значи блокирање на горните дишни патишта. Кај бебињата и децата, најчесто е предизвикана од зголемени тонзили или аденоиди. Други симптоми се ‘рчење, немирен сон, паузи во дишењето и кашлање или гушење.
Новороденчињата речиси секогаш дишат преку носот, освен ако носните патишта не им се блокирани на некој начин. Всушност, до околу три-четиримесечна возраст, бебињата сè уште немаат развиено рефлекс да дишат преку уста (освен кога плачат)
- Девијација на септумот: Понекогаш дишењето преку уста може да биде предизвикано од абнормалност во ‘рскавицата и коската што ги одделуваат ноздрите на вашето бебе една од друга. Ова може да доведе до проблеми со дишењето преку нос и може да биде честа појава кај луѓе кои имаат и тесна горна вилица (исто така поврзана со дишењето преку уста).
- Навика: Некои бебиња едноставно се навикнуваат да дишат преку уста по прележана настинка или од друга причина.
Како да му помогнете на бебето што спие со отворена уста
Ако бебето има тешкотии со дишењето или други симптоми покрај дишењето преку уста, консултирајте се со педијатар. Лекарот може да открие дали има блокада во дишните патишта, да препише лекови или да направи дополнителни тестови.
Можете да пробате и некои домашни мерки за олеснување на запушениот нос:
- Навлажнувач на воздух: Додавањето влага во воздухот може да помогне при затнат нос. Ладниот навлажнувач е најсоодветен за бебиња и мали деца за да се избегне ризик од изгореници. Ако немате навлажнувач на воздух, можеби би можеле да размислите да поседите со вашето бебе во бања додека пуштате топол туш за да создадете пареа.
- Аспиратор за нос: Дури и малку слуз може да го отежни дишењето. Можете нежно да го отстраните со аспиратор, но бидете внимателни да не го повредите носето на вашето малечко. По секоја употреба, аспираторот треба да се исчисти.
- Солен раствор: Неколку прскања со физиолошки раствор (солена вода) може да помогнат во разредувањето и олабавувањето на слузта пред да ја вшмукате со аспиратор.
- Хидратација: Погрижете се вашето бебе да пие многу мајчино млеко или адаптирана формула за да избегнете дехидрација и да го одржите протокот на слуз.
Кога да посетите лекар
Ако бебето нема запушен нос, а сè уште спие со отворена уста, консултирајте се со педијатар. Зголемените крајници и аденоиди ги опструираат горните дишни патишта и не реагираат на домашно лекување. Некогаш тие може да бидат и инфицирани, а некогаш може да се само поголеми поради генетиката. Во некои случаи, вашиот лекар може да препорача операција за отстранување на крајниците и/или аденоидите или корекција на други проблеми, како што е искривена преграда, кои предизвикуваат проблеми со дишењето.
Можни компликации ако бебето продолжи да спие со отворена уста
Можеби не сте помислиле дека дишењето на уста за време на спиењето би можело да има некои поголеми последици. Но, стоматолозите и лекарите велат дека постојат голем број потенцијални непријатности и други проблеми што би можеле да се развијат ако ова продолжи долгорочно. Дишењето преку уста може да има различни последици:
- Отечени тонзили;
- Сува кашлица;
- Воспален јазик;
- Проблеми со забите, како кариес;
- Лош здив;
- Гингивитис.
Постојат и потенцијални компликации, вклучувајќи го и „синдромот на долго лице“. Ова во основа значи дека долните црти на лицето на вашето дете може непропорционално да се издолжат. Карактеристиките што може да ги забележите вклучуваат работи како што се:
- поголема брада,
- гингивална насмевка,
- отворен загриз,
- целосно тесно лице.
Овие карактеристики може да се коригираат хируршки.
Дишењето преку уста може да ја намали и концентрацијата на кислород во крвта, што со тек на време може да предизвика срцеви проблеми или висок крвен притисок. Исто така, може да влијае и на квалитетот на спиењето. Децата кои дишат преку уста често не спијат толку длабоко, колку што спијат оние кои дишат преку нос. (Healthline)
