Утрово во 8 часот се отвораат вратите на вакциналните пунктови со што во земјава ќе стартува вакцинацијата против Ковид-19 на лица над 77 годишна возраст, кои ќе бидат имунизирани со вакцината на АстраЗенека. Термините се добиваат преку националниот систем „Мој термин“, каде матичните лекари закажуваат вакцинација на граѓани кои се опфатени во првата фаза и спаѓаат во групата 1Б, од Националната стратегија за Ковид имунизација.
Вакциналните пунктови низ државата ќе работат во две смени, ќе бидат отворени од 8 до 20 часот, од понеделник до петок. Матичниот лекар на секој граѓанин кога му закажува тремин за вакцинација должен е да му каже во колку часот треба да се вакцинира и на кој пункт во здравствената установа каде се спроведува вакцинација против Ковид-19
„Вакцинацијата ќе се одвива на постоечките вакцинални пунктови во здравствените установи во градовите низ државата. Вакцинацијата е прецизно организиран процес, испораката на вакцини ќе оди сукцесивно. До крајот на оваа и за следната недела, на територија на цела држава пуштени се 9577 термини, а досега закажани се 5976 термини за вакцинација на граѓани над 77 годишна возраст“, информираа вчера од Министерството за здравство.
Оттаму прецизираат дека од денеска вакцинацијата ќе стартува во Скопје, односно во Поликлиниките Јане Сандански, Чаир и Букурешт, во Здравствените домови во Прилеп, Охрид, Гостивар, Штип, Куманово, Велес, Битола, Струмица и во болницата во Кавадарци, а од петок ќе започне вакцинацијата во Тетово, Струга, Неготино, Крива Паланка, Вевчани, Валандово, Ростуше, Гостивар, Гевгелија, Делчево, Свети Николе, Ресен, Демир Хисар, Крушево, Македонска Каменица, Кратово, Кичево, Кочани, Радовиш, Виница, Пробиштип, Дебар, Пехчево и Македонски Брод.
Вакциналните пунктови ќе работат во две смени
Вакциналните пунктови низ државата ќе работат во две смени, ќе бидат отворени од 8 до 20 часот, од понеделник до петок. Матичниот лекар на секој граѓанин кога му закажува тремин за вакцинација должен е да му каже во колку часот треба да се вакцинира и на кој пункт во здравствената установа каде се спроведува вакцинација против Ковид-19.
Вакцината против Ковид-19 на АстраЗенека има ново име. Имено, досега се именуваше само како „вакцината на АстраЗенека“, а сега и официјално е регистрирана како „Ваксзеврија“ (Vaxzevria)
Ревакцинацијата со АстраЗенека е за 3 месеци
Ревакцинацијата со АстраЗенека е за 3 месеци, а според најавите останатата количина од 100 000 од оваа вакцина, преку Ковакс механизмот во нашата земја треба да стигнат до крајот на април.
„Нашиот експертски тим ја презема препораката и од компанијата и од други земји, а тоа е дека ревакцинацијата треба да биде за 3 месеци, што значи дека сега сите овие вакцини ќе се искористат. Веќе имаме најава дека останатите количини би требало да стигнат во месец април, тоа се до 100.000 коишто треба да стигнат во нашата земја… Ставот за вакцината АстраЗенека е една доза, а ревакцината после 3 месеци за разлика од сите други каде што ревакцината е за 3 недели“, изјави претходно министерот за здравство доц. д-р Венко Филипче.
АстраЗенека го претстави новото име на вакцината против Ковид-19 – „Ваксзеврија“
Вакцината против Ковид-19 на АстраЗенека конечно доби официјално име. Имено, досега вакцината се именуваше само како „вакцината на АстраЗенека“, а сега и официјално е регистрирана како „Ваксзеврија“ (Vaxzevria).
Како што истакнаа во соопштението за јавноста, иако името и пакувањето на самата вакцина ќе се променат, тоа нема да влијае на нејзиниот состав и функција. Промената на името ја одобри и Европската агенција за лекови.
-
Воведувањето на името, односно промената на името на вакцината, е своевиден нов почеток за АстраЗенека, чија вакцина од самиот почеток предизвикува внимание во јавноста, но и контроверзии
Вакцината, развиена во соработка со Универзитетот Оксфорд, долго време се сметаше за најверојатен кандидат за вакцина против Ковид-19, но грешките во дозирањето во клиничката фаза го продолжија процесот на одобрување и им овозможија на конкурентите да ги претркаат во излегувањето на пазарот.
Откако е во употреба, многу држави првично започнаа да ја користат вакцината за потоа или да ја ограничат нејзината употреба или целосно да ја запрат вакцинацијата поради низа сомнителни смртни случаи и компликации со згрутчување на крвта.
Европската агенција за лекови, како и самата компанија, истакнуваат дека вакцината е безбедна за употреба.
